Онлајн наставата претставува различен начин на поучување на учениците. За тоа дали може да го замени учењето со физичко присуство во моментов немаме доволно релевантни податоци со кои може тоа да се потврди, вели наставничката по хемија во ООУ „Јан Амос Коменски“ од Скопје, Александра Блажевска.
„Во моментов образовните системи во целиот свет се соочуваат со целосна трансформација, така што треба да се остави времето и искуствата да покажат колку ваквиот начин може да придонесе до квалитетно образование на учениците. Во секој случај, онлајн учењето има свои предности и недостатоци, но лично сметам дека претставува добар избор за продолжување на образовниот процес, од причина што со ваквиот начин на поучување ги подобрува дигиталните компетенции на учениците и ги подготвува со потребните вештини за работните места на 21 век“, вели Блажевска.
Блажевска вели дека таа лично нема потешкотии во реализацијата на онлајн наставата и дека во периодот на прогласувањето на пандемијата, кога училиштата се затворија, била принудена многу да истражува за да најде соодветен начин за реализација на наставата.
„Од друга страна знам дека сите наставници, не по своја вина, се соочени со ситуација на потешкотии во реализацијата на онлајн наставата. Проблемите произлегуваат од немањето соодветни дигитални уреди, бидејќи онлајн наставата само по себе побарува дигитална опрема, друга причина е брзиот развој на дигиталните апликации, така што се појавува така наречен дигитален јаз од немање вештини и компетенции кај наставниот кадар. Напоменувам, не дека наставниците не сакаат да учат, туку дека немаат соодветни и континуирани обуки за јакнење на нивните дигитални компетенции. Затоа мислам дека во иднина интезивно и системски треба да се размислува, за да не се доведеме во ситуации каде наставниците ќе бидат фрлени во „оган“, сами да се снаоѓаат како знаат и умеат, притоа чувствувајќи се исфрустрирано и немоќно“, вели Блажевска.
Блажевска вели дека досегашното искуство со онлајн наставата за неа е позитивно, но смета дека сè уште треба да се работи на свеста на учениците, дека тие треба подеднакво одговорно да пристапат кон процесот на учење.
„Моето искуство е позитивно, иако сметам дека се уште треба да се работи на свеста на учениците, дека без разлика што наставникот не го гледаат физички, тие треба поеднакво одговорно да пристапат кон процесот на учење, постои мала доза на несериозност од учениците кога станува збор за онлајн учење. Сметам дека во овој момент треба да работат заедно и родителите и наставниците, како и општеството, за да може со онлајн наставата да се постигне соодветен квалитет“, додава Блажевска.
Во однос на Националната платформа за учење на далечина, Блажевска вели дека претставува одличен проект и дека верува дека ќе ги исполни очекувањата на сите во образовниот процес.
„Националната платформа за учење на далечина претставува одличен проект, верувам дека ќе ги исполни очекувањата на сите во образовниот процес, од причина што таа нуди еден унифициран начин на реализација на наставата на далечина, прилагодена е за потребите на сите корисници, на македонски јазик, и ги содржи сите елементи неопходни за онлајн наставата. Можеби ќе биде потребно време на почетокот сите да се адаптираат и да ги почуствуваат придобивката на ваквиот организиран и систематизиран начин на реализација на наставата што го нуди самата платформа“, додава Блажевска.
Ангела Петровска