Пред седиштето на ВМРО-ДПМНЕ во Скопје, поточно пред новата зграда позната како „Белата палата“ беше поставен транспарент кој гласи: „ВМРО е таму кај што е Љубчо“. Лидерот на младите на ВМРО НП, Дино Блажески, за ЦИВИЛ Медиа, изјави дека транспарентот не го поставиле членови на нивната партија. Герила акцијата ја гледа како слободно изразување на нечие мислење, со оглед на тоа како последните 12 години функционерите на ВМРО-ДПМНЕ се однесуваат кон своите членови и симпатизери.
„Може било кој да го постави тој транспарент, бидејќи членството на ВМРО-ДПМНЕ по малку се ослободува од стегите на претходната гарнитура. Не ја исклучувам и можноста да е некој надвор од партијата, има почитувачи на работата и делото на поранешниот претседател на ВМРО-ДПМНЕ, Љубчо Георгиевски“, додава Блажески.
Тој истакна дека гледа позитивно на промената на лидерот на ВМРО-ДПМНЕ, и смета дека новиот лидер Христијан Мицковски може да направи промени, пред сѐ внатрепартиски.
„Добро е тоа што ќе има ослободување од стегите кои ги постави тогашната матрица. Сега очекувам да има понекомпромитирани лица, бидејќи и новиот лидер не е компромитиран и нема некаков товар. Ќе мора да се консолидираат внатре во партијата и да излезат како силна опозиција, бидејќи во моментов како да не постои опозиција“, истакна Блажески.
Тој вели дека граѓаните се навикнаа да не се случува ништо во државава, меѓутоа очекува од новата власт да го подобри економскиот статусот на граѓаните, да има повеќе вработувања, особено кај младите.
„Државата како да се навикна да стои во место и да не оди напред. Некои луѓе тоа го искористија за да се збогатат или да си ги исполнат нечесните интереси, како внатрепартиски така и државни. Сметам дека младите политичари треба да излезат како фактор во Македонија, и во 2018 година очекувам да има промени во секоја политичка партија не само во ВМРО-ДПМНЕ, бидејќи младата енергија, сила и идеи носат поширок спектар на предлози на некакво унапредување на состојбите во Македонија, кои некако од година во година како да стојат на место“, потенцира Блажески.
Текст и камера: Дехран Муратов
Фотографија: Биљана Јордановска
Монтажа: Ермин Климента