Британските пратеници изгласаа во средата забрана на Палестинска акција, група со седиште во Велика Британија која има за цел да ги попречи операциите на производителите на оружје што ја снабдуваат израелската влада, пренесува Си-ен-ен.
Пратениците гласаа со 382 гласови „за“ и 26 „против“ во корист на мерката против групата откако двајца активисти на Палестинска акција упаднаа во најголемата британска воздухопловна база во централна Англија, оштетувајќи два воени авиони.
Нацрт-наредбата за забрана ќе стигне до Домот на лордовите во четврток. Доколку биде одобрена од горниот дом, забраната ќе стапи на сила во следните денови.
Целосната забрана би значела дека би било нелегално според британскиот закон да се биде член – или да се даде поддршка за – Палестинска акција. Тоа би ја ставило групата на исто ниво со терористичките организации како што се Хамас, Ал Каеда и ИСИС – што предизвика осуда од експерти на Обединетите нации, групи за човекови права и политичари.
Палестинска акција објави во понеделник дека започнала судска постапка против одлуката на владата. Коосновачот на групата, Худа Амори, изјави дека рестрикциите ги отсликуваат „многу авторитарни режими низ целиот свет кои користеле антитероризам за да го задушат несогласувањето“.
Доколку забраната стапи на сила, веројатно ќе биде прв пат во историјата на Велика Британија група за протести со директна акција да биде забранета според антитерористичкото законодавство, според неколку застапници за човекови права.
Оние кои ја прекршуваат забраната би можеле да се соочат со затворска казна до 14 години, според полицијата за борба против тероризмот на Велика Британија и владата. Дури и носењето облека што „предизвикува основано сомневање“ дека некое лице е член или поддржувач на групата би можело да резултира со шест месеци затвор или парична казна, велат од полицијата.
Организациите за човекови права жестоко го критикуваа потегот на владата, велејќи дека тоа е најновиот во низата драконски мерки преземени од државата за сузбивање на легитимните протести во земјата.
Д. Мишев
