Бројот на вработени во ТИРЗ во април повторно бележи раст и достигна 16.700. Тоа е за 15 проценти повеќе од април 2022 година односно 20 проценти повеќе од 2021 година, покажува редовната месечна анализа на Дирекцијата, пренесува МИА.
Само од почетокот на годинава, информираа денеска од Дирекција за ТИРЗ, во компаниите во ТИРЗ се вработени речиси 500 наши сограѓани.
– Продолжува и растот на извозот кој заклучно со април достигна 1.230 милијарди евра. Само во април, компаниите во ТИРЗ реализирале извоз од 277 милиони евра што е за 12 проценти споредено со април минатата година. И увозот во првите четири месеци од годинава достигна над една милијарда евра. 250 милиони евра увоз оствариле компаниите во ТИРЗ само во април, што е на исто рамниште со април 2022 година, појаснуваат од ТИРЗ.
Поради ваквите економски движења, наведуваат, продолжува и позитивниот тренд на раст кај нето извозот кој заклучно со април е 20,5 проценти.
Инаку, годишната анализа на ТИРЗ покажала дека компаниите во Зоните, уплатиле 35 проценти повеќе средства во Буџетот на државата во 2022 година споредено со 2021 година. Односно, појаснуваат од ТИРЗ, за 1 евро исплатено од државата компаниите назад во буџетот враќаат најмалку 4 евра.
Податоците во анализата направена врз база на завршните сметки од компаниите покажува и дека тие оствариле ниво на нето добивка за 10 проценти повисоко споредено со претходната година, од кои исто така дел влегуваат во Буџетот. Корисниците на ТИРЗ регистрираат пораст на нето платата од најмалку 13 проценти во однос на 2022 година, што е повисоко и од растот на нето платата во националната економија.
