„2018 година беше исклучително интересна година, иако ние може да кажеме дека секоја година во македонското општество ја оценуваме како судбинска, интересна, поврзана со големи настани… Така беше и минатите три – четири години, кога практично се создаваше таа база за позначајни промени во општеството и 2018 година требаше да биде таа година што навистина ќе ги донесе промените во општеството, не само на еден симболичен начин, туку и на посуштински начин во повеќе сфери на живеењето“, изјави претседателот на Здружението на новинари на Македонија, Младен Чадиковски, за „Перспективи 2019“.
Иако 2018 година според него требаше да биде таа година на позначајни промени во општеството, Чадиковски вели дека тоа не се случило во доволна мера или барем не онака како што очекувале граѓаните кои сакале да видат едно поинакво општество.
„Тоа сепак беше поттиснато од други настани и случувања, бидејќи Владата и најголемиот дел од владиниот тим беа фокусирани на надворешната политика и тоа доведе до ситуација да бидат запоставени домашните задачи и обврски. Дали некој денеска се сеќава на извештајот на Прибе, на пржинските обврски и на работите кои што требаше да донесат суштински промени… Веројатно тоа сега е оставено само како дел од медиумската заедница која постојано го потсетува и премиерот и останатите на овие обврски што се исклучително значајни. Но, од друга страна пак, го добивме Преспанскиот договор, којшто е еден навистина значаен, иако за многумина во општеството болен чин бидејќи предвидува промена на уставното име на Македонија, но ги отвора перспективите за Евро-атланска интеграција, прво НАТО па потоа и преговорите со Европската унија“, вели Чадиковски.
Чадиковски вели дека за оваа 2019 година и за промените на внатрешниот план во државата, очекувањата се секогаш големи, но доколку се следи досегашниот период низ што сè поминала Македонија и како настапувале промените во институциите, тој не може да каже дека е преголем оптимист.
„После Преспанскиот договор, многу работи ќе зависат од личниот капацитет на оние што ги водат и создаваат политиките и на оние што ги спроведуваат. Не е важно само на врвот да имате две – три умни глави кои што знаат што да кажат, многу е поважно како сето тоа ќе се спроведе на терен. Политичката волја е едно и се надеваме дека за поголеми промени постои, а второ е како сето тоа ќе се спроведе на терен“, додава Чадиковски.
„Ако Македонија ги добие преговорите со ЕУ, тогаш мислам дека ќе бидеме под посилни рефлектори и овој полу мрак на функционирањето на институциите ќе биде силно осветлен и работите би оделе под поинакво темпо. Остварувањето на целта на преговори со ЕУ исто така е тешка задача и не сум убеден дека Брисел ќе ја грантира Македонија за сето тоа што го постигна со меѓународната полтика. Мислам дека тие ќе инсистираат на домашните задачи, правосудството, битката со корупција, медиумите и ослободување на пазарните стеги на економијата, за да почнат преговорите со ЕУ“, додава Чадиковски.
Ангела Петровска
Камера и фотографија: Дехран Муратов
Монтажа: Биљана Јордановска
