Хелсиншкиот комитет за човекови права на Република Македонија остро реагира на „инертноста која Јавното обвинителство ја покажува во случајот на Тамара Димовска, која поради огромниот пропуст и незаконитото постапување на Фондот за здравствено осигурување, почина на денешен ден пред две години“
Хелсиншкиот комитет бара итен одговор од Јавното обвинителство за исходот од постапката покрената за малолетната Тамара Димовска и најавува дека во спротивно ќе поднесе жалба до Европскиот суд за човекови права.
„По смртта на малата Тамара, ХКМ изготви и поднесе кривични пријави против одговорните, а поради сомневање за сторување на кривични дела од членовите 353 став 1 и 2 од КЗ на Република Македонија, односно злоупотреба на службена должност и членот 353-в став 1 и 2 од КЗ на Република Македонија, односно несовесно работење во службата. Кривичната пријава до Основното јавно обвинителство беше поднесена на 19 февруари 2015 година и до ден-денес, Комитетот нема добиено никаков одговор од ОЈО Скопје, иако се изминати точно две години. Ваквото непостапување од ОЈО Скопје е спротивно на член 275 од Законот за кривичната постапка, со кој член се пропишува дека ако јавниот обвинител во рок од три месеци од денот на приемот на кривичната пријава не одлучи по пријавата, должен е веднаш да го извести подносителот на кривичната пријава и повисокиот јавен обвинител“, се вели во соопштението на Хелсиншкиот комитет.
Хелсиншкиот комитет и мајка на малолетната Тамара, Жаклина Димовска, поднеле барања до Вишото Јавно обвинителство Скопје, до Јавниот обвинител на Република Македонија и до Советот на јавни обвинители, за спроведување надзор над работата на ОЈО Скопје, за да се утврдат причините за одолговлекувањето на постапката, а побарале и Вишото Јавно обвинителство Скопје да го преземе кривичното гонење во овој случај.
Според ХКМ, по стручниот колегиум на ОЈО одржан на 8 февруари минатата година, кога било одлучено постапката да продолжи со непосредно обвинение пред надлежен суд, доколку обвинетите не го користат своето право на спогодување на вина, ниту барателите – Комитетот и мајката на Тамара, ниту македонската јавност, не добиле известување дали осомничените се спогодиле со Обвинителство или е поднесен обвинителен акт, иако според членот 8 од Законот за јавното обвинителство тоа е должно да ја информира јавноста за одделни случаи, особено ако предизвикуваат поширок интерес во јавноста.
