Во пресрет на денешната прес конференција на техничкиот министер за внатрешни работи Наќе Чулев, ЦИВИЛ МЕДИА ги постави следните прашања:
- Кој ќе одговара за литијата во Струга?
- Кој ќе одговара за прославата на МВР на 7 мај?
- Кој ќе одговара за собирот на навивачи пред цркавата Свети Спас на 4 мај?
- Кој ќе одговара за непостапувањето при оро во Чаир додека полициска кола поминува среде оро и не презема ништо?
- Кој ќе одговара за случајот „Мицкоски и теретана“?
- Дали обезбедувањето носело ракавици или сѐ уште е на ставот дека станува збор за отсјај?
- Дали г. Чулев оправдува партиски лидер да се јавува кај полициски функционери и да врши притисок за предмет за кој има истрага?
- Дали се работи на одговорите на прашањата поставени претходно во врска со снимањето на спотот по повод Денот на полицијата?
- Дали се работи на одговорите на прашањата поставени претходно во врска со приведувањето и задржувањето на малолетниците во Штип, на 17 мај, во 23:50 часот?
Последните две прашања се дел од претходни обраќања на Редакцијата до Министерството за внатрешни работи во изминатите неколку месеци, а на кои Редакцијата сѐ уште чека одговор.
Техничкиот министер за внатрешни работи, Наќе Чулев не даде конкретен одговор на ниедно прашање од ЦИВИЛ Медиа. На самиот крај на прес конференцијата, Чулев ги скрати и обопшти прашањата:
“И на крај, од страна на Цивил Медиа значи има девет прашања, од кои што речиси сите се поврзани со тековни постапувања на Министерството за внатрешни работи, за литијата во Струга, за прославата на МВР, орото во Чаир, случајот Мицкоски и теретана, Свети Спас, 4 мај, и така натаму”, беше скратената верзија од прашањата.
Иако е за одбележување барем тоа што, за прв пат, техничкиот министер прифати дека постојат прашања и од ЦИВИЛ МЕДИА тој, сепак, не понуди вистински одговор на нив.
„Техничкиот“ Чулев вака одговори на поставените прашања:
„Она што сакам да ве информирам е дека Министерството за внатрешни работи на најтранспарентен начин ја информира јавноста во врска со сите случаи од делот на Министерството за внатрешни работи, и за наведените случаи Министерството за внатрешни работи веднаш презема активности во соработка со Основното јавно обвинителство со цел идентификување на лицата инволвирани во настанот и со поднесување на соодветни поднесоци во соработка и координација со Јавното обвинителство, а во однос на евентуално непостапување на полициските службеници надвор од овие протоколи и правилници констатирам дека како Министерство за внатрешни работи постапува одделот за внатрешна контрола, криминалистички истраги и полициски стандарди, и како и што сме правеле до сега штом се завршат овие истраги значи ќе биде јавноста благовремено информирана.“
