ДИЈАНА ТАХИРИ
Деновиве е срамно да живеш во Скопје, главниот град на Северна Македонија, или, како што често се милува да се нарече „метропола“. Метро град- пола џунгла! Или обратно.
Не знам дали попрво да се осврнам на „големата грижа за граѓаните“ од страна на државата во однос на личните документи и патните исправи за кои голем број од граѓаните треба да одвојат време ( од работното, слободното приватно) и плус пари од месечните примања за да си обезбедат пасоши со придавката „Северна“, а за што веќе се потрошени тие пари при помена поради истекување на исправите – а од државата не се погрижија навреме да се издадат со новото име. Не прашувајте како знам – вадев пасош пред две години! Ако не друго, барем трошоците да ги покриеше државата.
Или, денешниот срам – скопјани 8 часа ( а можеби и повеќе), немаа јавен превоз.
Причините за штрајкот на работниците на ЈСП ја знаеме, но, не е јасна причината зошто не се изгласаа субвенциите на првата седница, штом веќе се изгласаа на втората, или продолжението на првата, како и да е. Или, зошто мораше на почетокот на втората седница да се побара пауза од 30 минути, во 15: 30 часот?! Токму кога на граѓаните им завршува работното време!?
Како што прочитав, советниците од ВМРО -ДПМНЕ на првата седница биле воздржани, па затоа не се постигнал бројот гласови за субвенциите ( бидејќи ако си воздржан, никој нема да се лути!). Но, ова е позната вмровска игра, само, не знам со кого, со гласачите ли?
На втората седница, координаторка на СДСМ побарала пауза од 30 минути, во 15: 30 часот. Не се знае зошто е побарана паузата, но од каде што седам јас, и не само јас, тоа се толкува како намерна тактика, со акцент на 15:30 часот! Слободно нека се изјаснат зошто токму тогаш е побарана пауза. Можеби и ќе поверуваме.
Скопјани на времето памтеа кој ги врти, кој не ги врти, а кој си игра на нивна сметка. Не сум сигурна за сега, на многу им зависат работни места, па ќе си премолчат и за патни исправи, ќе си чекаат редови за пасоши, ќе чекаат паркирани автобуси на минусни температури, и ќе продолжат со сивиот живот во очекување на некое државно работно место за своите деца, внуци, роднини, секако, по „гласање по убедување“ на следни избори.
Посебен поздрав и до владата, на која за жал, баш денеска и се погоди да има хаос во сообраќајот, на денот кога се одржуваше состанокот на лидерите од Западен Балкан, па не можеа да реагираат експресно. А, можеби и не дознале. Не се возат со јавен превоз.
И, така. Помина уште еден ден, уште еден срам. Памтете кој ве врти, кој не ве врти, и кој си игра на ваша сметка. Не се знае тркалото кај кого ќе застане во иднина…
