Денеска се одбележува Денот на 1. механизирана пешадиска бригада (1.мпбр) свечено дефиле на припадници на единицата и обраќања на командантот на 1.мпбр, бригаден генерал Мирче Ѓоргоски, и на министерката за одбрана Радмила Шекеринска.
Неодамна Велин Стојановски, магистер по национална безбедносна стратегија, во една од своите колумни го означи овој ден како скандалозен.
Во своето обраќање до претседателот Ѓорѓе Иванов, посочувајќи ги сите спорни одлуки како Врховен командант на Армијата, Стојановски вели дека критериумите, доколку ги има, по кои се одредуваат битните денови за одбележување на Армијата, се сосема погрешни и историски неточни.
Имено, Стојановски посочува дека 2 април е погрешен датум затоа што 1. пешадиска бригада е трансформирана во 1. механизирана пешадиска бригада во 2005 година и тоа на 19 декември, а командата на 1. МПБР од Штип се пресели на 2 јули 2012 година, а не во април, како што е одлучено.
Стојановски тогаш го постави прашањето каква традиција е преместување на еден гарнизон во друг.
„Според кои критериуми е одреден денот на 1.мпбр, ако се има предвид дека на 2 април 2012 не се случил никаков настан освен што е почната трансформација на АРМ и бригадата според последната формација, а се одредува како ден на бригадата?“, изјави Стојановски за ЦИВИЛ Медиа, посочувајќи го прашањето директно до Иванов.
„Нели е тоа преправање на историјата?“, прашува Стојановски.
Во меѓувреме, врз основа на оваа одлука на Иванов, на пригодната свеченост по повод Денот на 1.мпбр ќе биде прогласена најдобра единица од составот на бригадата и ќе се доделат стимулативни мерки и унапредувања на нејзини припадници.
Б.Јордановска
