Македонската православна црква ги демантира обвинувањата дека Скопската православна епархија извршила набавка на пловен објект во вредност од 180.000 евра.
„Станува збор за пловен објект кој е во сопственост на фирмата ‘Сис Травел Груп’, донесен на чување во манастирот Калишта, а од сопственикот на фирмата е дадена согласност и манастирот да го користи по потреба“, стои во демантот на МПЦ.
Од охридската Капетанија велат дека се информирани за пловниот објект. Тие потврдуваат дека како увозник на пловниот објект се јавува фирмата „Сис Травел Груп“ и дека истото е во постапка на регистрација.
Во моментов, пловниот објект, поточно, луксузниот глисер е паркиран на пристаништето на хотелот „Бисер“, а според дел од медиумите, монасите земаат часови за обука од вработени од Капетанијата! Од Капетанијата, пак, велат дека немаат информации за тоа дали монасите земаат часови за обука.
Демантот на МПЦ, за сопственоста на пловниот објект, сепак, не го оспорува фактот што монасите го кршат законот, управувајќи со чамецот кој сè уште не е регистириран и без соодветна дозвола за управување. Горан Устијановски, капетан на охридската Капетанија вели дека има информација дека монасите управувале со чамецот, но и дека ќе бидат соодветно санкционирани, тогаш кога ќе ги затекнат.
За потребата од користење на вакви луксузни пловни возила, како и за прекршувањето на законот од монасите, зборувавме со едно свештено лице, кое за ЦИВИЛ Медиа вели дека не е невообичена потребата од пловни објекти, особено на оние манастири кои се наоѓаат покрај вода. Тој вели дека многу поважно е прашањето, дали навистина има потреба тие да бидат толку скапи и луксузни.
Од нашиот соговорник побаравме коментар за сè почестите обвинувања за расипништво на свештените лица. „Онаму каде нема можност да се врши контрола, има простор за расипништво“, вели тој, повикувајќи се на нетранспарентноста на МПЦ за финансиското работење.
За однесувањето на монасите и кршењето на законот, свештеникот ни изјави: „Некој им дозволува. Црквата има одговорност да ги почитува законите! Тие имаат одговорност пред оние кои го спроведуваат законот!“
Се прашуваме, доколку Капетанијата не успее да ги затекне монасите како го прекршуваат законот, дали казната ќе ги стигне на оној свет?
Маја Ивановска