„Нашата партија се залага за членство во ЕУ и НАТО. Свесни сме дека процесот на евро интеграциите добро се одвива и убеден сум дека овој процес ќе донесе добри резултати за сите граѓани во Македонија. Затоа мораме да ги почитуваме критериумите од Мастрихт и Копенхаген што значи дека мора да внимаваме во однос на политичките и економските критериуми коишто се однесуваат на членството на ЕУ“, изјави Бардиљ Даути, министер без ресор од ДПА на конференцијата Македонски перспективи: Како до Европа?, во организација на ЦИВИЛ и МЦМС.
„Процесот на реформи што го презеде оваа Влада за подобрување на индикаторите како што се владеење на правото, ефективност во управувањето, борба против корупција, како и подобрување на услугите од јавните органи, квалитетот на живот, мислам дека ќе имаме значителен и позитивен ефект и дека ќе ги зајакнат домашните институции што, пак, ќе има позитивен ефект во привлекување на странски инвестиции.
Сметам дека решавањето на овој спор за името со Грција ќе придонесе да се донесат странски директни инвеститори што ќе сакаат да го вложат својот капитал во земјата што ќе биде позитивна промена во животот на граѓаните во Македонија“, изјави Даути.
„Знаете дека имаме територијални закани од истокот, од Русија, имаме културолошки промени што доаѓаат од југоистокот на Турција и други земји, имаме и други закани, како на пример, миграциските кои доаѓаат од арапските земји и ако Македонија не е интегрирана што е можно поскоро тогаш внатрешната политичка организираност на Европа ќе биде под ризик. За да имаме посилни и побезбедни политички граници на Европа клучно е оваа земја да се интегрира затоа што на тој начин Европа ќе биде побезбедна и ќе се избегнат сите потенцијални трошоци што би можеле да произлезат преку културлошките проширувања што доаѓаат од исток“, истакна Даути во контекст на важноста на Македонија да биде дел од ЕУ, како земја што може да придонесе кон стабилноста на Европа, со оглед дека е врска меѓу Истокот и Западот.
Конференцијата е дел од проектот „Слободни медиуми за слободно општество“ што ЦИВИЛ го спроведува со поддршка на Федералното министерство за надворешни работи на Сојузна Република Германија.
Биљана Јордановска
Камера: Атанас Петровски
