Александар Диневски, еден од обвинетите во случајот „Шпион“, моментално се наоѓа на лекување, откако во петокот беше приведен за доиздржување на казна затвор, вели Звонко Давидовиќ, адвокат на обвинетиот во интервју за ЦИВИЛ Медиа.
Во интервјуто Давидовиќ одговора на прашањето на ЦИВИЛ Медиа како дојдовме во ситуација, кога обвинет во политички монтиран случај, констатација на тогашната опозиција и сегашна власт, невладините организации кои се борат за човекови права и меѓународната заедница, да биде вратен на издржување на казната и зошто овој пат освен реакции на социјалните мрежи, власта не е премногу заинтересирана за состојбата на Диневски.
Според Давидовиќ, оваа ситуација со Диневски пред сè се должи на бавното спроведување на реформите во судството.
„Состојбата во судството е таква, што реформите сè уште не се почнати. Сега сме во ситуација кога знаеме што е правда и што е правичност, но не можеме тоа да го примениме во пракса, затоа што кадровските промени, суштинските промени не се направени“, вели Давидовиќ.
„Друго е прашањето за тоа дека за овој и за други вакви политички монтирани случаи тогашната опозиција имаше сериозни индикации дека не се во ред, а не се направи напор на време, пред да дојде до оваа ситуација, да се изврши ревизија на тој предмет“, истакна тој.
Давидовиќ вели дека кај Диневски којшто многу пати работел за доброто на оваа земја, којшто јавно откри снимени разговори и беше еден од осумтемина коишто први бараа демократизација во МВР уште во тоа време, е просто неверојатно да се обвини за шпионажа, без притоа да се дадат јасни и цврсти докази за такво нешто.
„Она на што апелирам, е што поскоро да се направат реформите, како во делот на правната регулатива, но и кадровските промени. Еднаш засекогаш да воспоставиме систем, правила на игра и на однесување, за да не ни се случи повторно она што ни се случуваше, затоа што последиците ќе ги чувствуваме уште долго време. Диневски е само последица на функционирањето на судството во изминатиот период“, заклучува Давидовиќ.
Дехран Муратов / Маја Ивановска
