Пред Административниот центар на Владата на Република Српска во источно Сараево утрово владее мир, по бурната ноќ во која припадниците на Државната агенција за истраги и заштита (СИПА) се обидоа да го уапсат претседателот на РС, Милорад Додик, јавуваат српските регионални медиуми.
Силни сили на Министерството за внатрешни работи на Република Српска се уште се присутни на терен кои ги обезбедуваат приодите до зградата. Медиумите не смеат да се приближат до објектот, исто како што беше случај претходната вечер.
Не се знае дали Додик се уште е во зградата или во текот на ноќта ги напуштил просториите на Владата на РС, a вчера присуствуваше на средба со шефовите на општините од подрачјето на Источно Сараево и градоначалникот Љубиша Ќосиќ.
Тројца инспектори на СИПА вчера пристигнаа пред капијата на Управниот центар на Владата на РС, со цел да го доведат Додик на распит. Ова е прв ваков обид откако Судот на Босна и Херцеговина издаде централна потерница по претседателот на РС.
Меѓутоа, нивната намера била спречена од вооружени припадници на полициската управа Источно Сараево, Жандармеријата и Специјалната антитерористичка единица на МВР на Република Српска. Наредени пред зградата ја спречија СИПА да влезе во објектот.
Инаку, со спречување на легитимното дејствување на државната полиција, припадниците на МВР на РС практично учествуваа во попречувањето на работата на правосудните институции на Босна и Херцеговина.
Д. Т.
