„Украинците многу добро знаат што значи руска чизма и руска пропаганда бидејќи под неа живееле и во времето на Советскиот Сојуз, а и потоа. И се разбира, сите тие дваесет и неколку години, поточно колку што Путин е на власт во руската федерација. Тие многу добро знаат што е пропаганда и знаат дека вредноста на луѓето кои се борат против пропаганда е многу висока и дека, едноставно, кога се соочувате со пропаганда, треба да знаете, да сте свесни дека пропагандата убива, исто како што убиваат бомбите, односно не знаете кој попрво убива“, рече Џабир Дерала, претседател на ЦИВИЛ и главен уредник на медиумската платформа наа организацијата во интервју за ТВ Шења, кое го водеше познатиот новинар и поранешен претседател на ЗНМ, Насер Селмани.
Според Дерала, Путин не ја почна својата пропаганда во 2022 година, исто како што не ја почна војната во 2022 година, туку ја почна во 2014 година со Анексијата на Крим и со воената агресија во Одеса, каде што имаше над 100 жртви.
„Руските сили не беа означени со ознаки на руската федерација, но сите знаеме дека се тоа руски сили. Се обидоа да ја заземат Одеса, па не им успеа. Има 100 жртви украинскиот народ од само таму. Само во тие денови во борбите околу Одеса“, потсети Дерала.
Тој се наврати и на Партнерството за мир на НАТО, кое Путин го искористи за свои цели.
„Ако се сеќавате, постоеше едно партнерство за мир во 1994 година. Кога Русија влегува во Партнерството за мир имаше помалку искрени, но и по малку неискрени намери. А кога дојде Путин на власт и кога ја презеде улогата на човек кој ја застапува руската федерација во партнерството за мир во 2000 година, ние уште тогаш требаше да видиме, Западот требаше да види – дека тој е таму за да го искористи времето и да ги планира своите империјалистички чекори“, рече Дерала.
Тој потенцираше дека тоа се видело во 2008 година, кога по Самитот на НАТО во Букурешт ја нападнал Грузија, а претходно имал разноразни воени авантури и интервенции и на друг начин се обидувал да влијае врз безбедноста на Европа и воопшто во Кавкаскиот регион или Евроазија.
„Почна со продорот во Африка и сега Африка е во голем дел под контрола на руските центри на моќ. Влијанието во Сирија е несомнено. Неговите прсти или отпечатокот од руските прсти, дали директно или индиректно, може многу лесно да се види и во најновиот крвав конфликт кој изби на Блискиот Исток меѓу Израел и Палестина, каде што гледаме една крвава битка. Ова е конфликт меѓу Израел и Хамас, меѓутоа палестинските граѓани и граѓанки страдаат во овој конфликт, исто како што во нападот на Хамас настрадаа толку цивили меѓу Израелците“, рече Дерала.
Тој додаде дека намерата е да се дефокусира Западот од она што се случува во Украина и дека првенствената улога е да се дестабилизира што поголем дел од светот. Дерала потсети и дека во Африка прашање на време е кога ќе се појават нови жаришта.
Во однос на констатацијата дека не им успеала намерата на Русите во Косово, Дерала рече дека нема неуспех за руската хибридна закана, бидејќи што и да постигнат тоа е добро. Макар и минимален успех на руската хибридна закана, таа носи некаков профит.
Според Дерала, неприфатливо е што цела една држава не видела дека се подготвува една жестока терористичка акција.
„Тоа не може да биде без знаење на државните структури. Може глумецот Вучиќ да глуми лудило, ама знаеме дека на највисоко ниво, ако ништо друго, им биле замижани очите. Дури и тоа ќе го наруши балансот, односно ќе ја наруши динамиката на српско-косовските односи, што значи дека понатаму се очекуваат тензии во нивните односи. Без оглед дали Србија ќе трпи санкции, како што претходно имаше закана со санкции и против власта на Курти, односно Косово“, заклучи Дерала.
М. П.