„Беше очекувано дека најголемиот товар во министерството и најголемиот закон што ќе биде проблем, ќе биде Законот за Јавно обвинителство. Тоа се гледаше од самиот почеток, затоа што тука има потреба од 2/3 мнозинство кое треба да го обезбедиме од пратеничка група на опозицијата која што има лични случаи кои се водат пред обвинителството. Сега, како вие ќе очекувате дека некој ќе даде поддршка на принципиелни решенија на Законот ако самиот тој е засегнат од тој закон? Тука беше јасно дека ќе имаме проблем. Од една страна е желбата да воспоставите ефикасен систем на јавно обвинителство, а од друга страна желбата и личниот интерес на некои да се спасат од тоа ЈО“ – открива министерката за правда, Рената Дескоска во дебатната емисија „Топ тема“ на ТВ Телма.
Дескоска вели дека многу детално го анализирала пресот на лидерот на ВМРО ДПМНЕ. Според неа, Мицкоски само се обидел да наброи девет забелешки што ги има на Законот.
„Во анализата се покажува дека, практично, првите осум забелешки не се нешто многу страшно и не се нешто што прави сериозен расцеп. Клучниот проблем што го имаме и клучната разлика е во деветтата забелешка кај што се бара, практично, да нема надлежност за гонење на кривични дела поврзани и кои произлегуваат од содржината на незаконското следење на комуникации. Тоа значи дека директно или индиректно се бара да се отстрани надлежноста на кривични дела кои беа почнати од СЈО“ – анализира Дескоска.
Во врска со противењето на опозицијата за номинирање на Дескоска за членство во Венецијанската комисија, таа вели:
„Интересот на опозицијата за моето номинирање од Владата и сега членство во Венецијанската комисија е ад хоминем и не е принципелно“. Дескоска додаде дека има неколку примери каде министри за правда биле челнови на Венецијанската комсиија.
Дескоска ги наоѓа мотивите за нападите против неа во обидите да се осуети донесувањето на законот за ЈО.
„Кога го гледаме изминатиот период секогаш кога ќе дојдеше да биде топ тема Законот за ЈО, ВМРО-ДПМНЕ почнуваа со лични напади. Тоа може да го видите и во септември минатата година кога ја пуштивме втората верзија кога Христијан Мицкоски почна да ме спомнува постојано на прес конференциите“ – вели Дескоска.
Анализирајќи го процесот на креирање на Законот, Дескоска истакна дека почетна точка во градење на законот биле реформите, односно СЈО како посебен орган во кој не смеат да се мешаат други виши обвинители.
„Видовме дека таа идеја не можевме да ја спроведеме поради ВМРО-ДПМНЕ. Од опозицијата јасно беше кажано дека нема да поддржат ни С од Специјално јавно обвинителство, ниту пак некаков посебен концепт на такво обвинителство. Потоа направивме да го нема СЈО, и сите предмети се префрлени во регуларното обвинителство, посочи Дескоска.
Сигналите од Европската унија дека е добро да се донесе овој Закон за Јавно обвинителство, меѓу другото се доказ за квалитетот на законското решение, рече Дескоска.
„Ако имаме 80 пратеници ќе влеземе во собраниска процедура на носење на Законот. Според мене, созреана е свеста кај пратениците од важноста за носење на Законот за Јавно обвинителство. Иако овој Закон не е услов за нашата евроинтеграција, имаме можност да пратиме порака дека сме спремни да изградиме силни, независни капацитети кои ќе се справат со корупцијата“, истакна Дескоска.
На прашањето за Јавен обвинител на предлог на опозицијата, Дескоска рече дека тоа во сегашната поставеност, не е возможно.
„ВМРО-ДПМНЕ на секој начин се обидува да ја опструира правдата и процесите што се во тек. Нивно клучно барање е да ги нема случаите на СЈО. Недозволиво е луѓе кои се лично засегнати во судски предмети, да предлагаат свој обвинител и сами да се гонат за предметите, нив ги интересира само судбината на предметите на СЈО“, заклучи Дескоска.
