Министерката за правда, Рената Дескоска, која ја отвори јавната расправа за Законот за јавно обвинителство во собраниската комисија за политички систем, без заобиколување, сосема недвосмислено и јасно, говореше за процесот низ кој минуваше овој законски проект. Дескоска сподели дека уште на самиот почеток, станало јасно дека тоа ќе биде најжешкиот костен во рацете на министерството со кое раководи. Сепак, министерката изрази очекување дека сите партии ќе ги надминат своите интереси и ќе гласаат за законот кој обезбедува независно, објективно и професионално обвинителство.
Пред присутните, високи претставници на судовите и обвинителствата, експерти, како и меѓународни претставници, Дескоска откри неколку точки за кои опозицијата настојувала да ги протне во законот, но поголем дел од нив биле во правец на заштита на криминалот на функционерите на ВМРО ДПМНЕ, односно како да се укинат предметите на СЈО.
„Беше отворено прашањето каква треба да биде улогата на политичките партии во изборот на јавните обвинители – дали е потребна политиката или не. Потоа, дали да се предвидат рокови за одредени постапки, како на пример за тие на СЈО, што е ограничување во делувањето на обвинителствата. Дали одредени докази ќе бидат докази или не, особено прислушуваните материјали. Дали да се воспостави лична материјална одговорност за обвинителите во случај на повреда на правото, што пак од друга страна ќе ги пасивизира обвинителите. Ние внимававме да ги имплементираме меѓународните стандарди и со поддршка на меѓународната заедница да стигнеме до ова законско решение“ – поентираше Дескоска.
Таа информираше дека се прават измени во обвинителскиот систем, односно се утврдени построги критериуми при изборот на обвинителите, се дефинира јасна дисциплинска постапка, критериуми за оценување на обвинителите и се гарантира финансиска стабилност.
„Мораме да воспоставиме систем кој ќе има финансиски гаранции, особено обвинителствата кои ќе работат на предмети од висок ризик, оние кои ќе продолжат да работат на досиејата од СЈО… Се дава можноста, обвинителството самото да може да побара меѓународна правна помош, а не тоа да оди преку министерството, со што ќе се заштити доверливоста на постапката“ – изјави Дескоска.
Новите надлежности за обвинителите ќе повлечат и поголем број обвинители, што значи дека во иднина задолжително ќе мора да се зголеми нивниот број.
