„Денеска, можевте да видите дека еден од говорниците, практично советникот на Груевски т.е. Мицкоски ги кажа главните поенти на ВМРО-ДПМНЕ и она што тие го третираат како пречка за носење на законот. Главниот проблем е всушност продолжувањето на постапките од СЈО. Тоа го кажаа денеска, веќе и јавно. Мислам дека желбата кај ВМРО-ДПМНЕ да ги заштити своите членови и поранешното раководство што се обвинети од СЈО, а кои постапки сега продолжуваат, е посилна од потребата да помогнат во евроинтеграцијата на земјата. Значи, клучните точки кои што се отворени се всушност продолжување на постапките за јавно обвинителство и градењето на ефикасен систем во рамките на ЈО за борба против криминал и корупција“, изјави денеска министерката за правда Рената Дескоска за ЦИВИЛ Медиа.
Дескоска истакна дека цело време намерата на ВМРО-ДПМНЕ е на мала врата да се внесе амнестија во законот што ќе значи стопирање на сите постапки што биле почнати. Дескоска потенцираше дека тоа нешто е недозволиво.
„Најтрагично и најжално беше пред неколку дена кога беше закажана поширока работна група, тие не беа спремни дури ни да разговараат бараа најразлични алибија. Сите други пратенички групи покажаа спремност да влезат во процесот и тоа ме охрабрува. Јас очекувам дека без разлика на различните ставови, без разлика на ставот на ВМРО-ДПМНЕ ќе се најде мнозинство од 80 пратеници што ќе го поддржат Законот за ЈО“, истакна Дескоска.
Од она што досега можеше да се слушне на јавната расправа на која беа поканети и експерти, професори, претставници на граѓанското општество, Дескоска рече дека се слушнаа најразлични ставови, некои и дијаметрално спротивни, но охрабрувачки е што во рамките на другите пратенички групи може да се оформи мнозинство а тоа е дека нема потреба изрично во законот да се наведе дека постапките продолжуваат бидејќи истите ќе продолжат по сила на Законот за кривична постапка.
„Иако камен на сопнување е тоа дека сите постапки продолжуваат и нив тоа ги плаши, а ако не е неопходно тоа да стои, мислам дека тука можеме да градиме консензус. Како што се што беше конструктивен предлог ќе биде ставен на разгледување, ќе се стави како опција и ќе бараме согласност… Пратениците ќе можат да извлечат заклучок затоа што имаше аргументирани ставови, но имаше и ставови што беа чисто ставови како да беа пишувани во прес центарот на ВМРО-ДПМНЕ. Мислам дека многу јасно излезе на површина поделбата на аргументи и на она што значи политичко залагање без експертска подлога“, изјави Дескоска.
Јавната расправа за Предлог законот за Јавно обвинителство денеска започна со расправа, но по прашањето дали Јавниот обвинител, Љубомир Јовески, може да излезе на говорница уште еднаш или не.
Биљана Јордановска
Камера: Дехран Муратов
