Кандидатите за Град Скопје ветуваат ин-витро за млади брачни парови, нови спортски инклузивни игралиштa за децата со попреченост, гратис маичка доколку се донира по 300 денари за кампањата на ЗХГ. И денеска трагедијата во која загинаа 14 лица во модуларната болница во Тетово беше искористена за собирање политички поени.
ГРАД СКОПЈЕ, ВМРО-ДПМНЕ, ПОЖАРНИКАРИ…
Актуелниот градоначалник на Град Скопје и кандидат за претстојните локални избори, Петре Шилегов денеска во Градскиот парк заедно со сите кандидати од скопските општини на коалицијата на СДСМ, презентираше пакет мерки наменети за идните родители, децата во градинките, учениците од основните и средните училишта и студентите од Скопје. Градоначалникот Шилегов со скопските кандидати вети субвенции за децата во градинка, прехрана во училиште и ин витро за млади брачни парови.
Независната кандидатка за Град Скопје, подржана од ВМРО-ДПМНЕ, Данела Арсовска вели дека Скопје ќе биде повторно градот на солидарноста! Скопје ќе биде пример за град каде што се промовира социјална правда.
Ќе се воведат пристапни рампи и лифтови во сите објекти и автобуси, ќе се подобри сообраќајната инфраструктура со воведување семафори за сигнализација и ќе се изградат тактилни патеки за лицата со попреченост. Нови спортски инклузивни игралиштa ќе бидат изградени за децата со попреченост. Волонтери секоја недела ќе доставуваат намирници од основни производи до домовите на старите и изнемоштени лица. Ќе се отворат центри за жртви од семејно и родово базирано насилство и насилство базирано врз основ на сексуална ориентација.
Арсовска се пожали дека денеска и беше забрането да влезе во просториите на Територијалната противпожарна единица – Автокоманда каде требаше да имам средба со Синдикатот на пожарникарите на Скопје.
„Иако имавме однапред договорено средба на влезот на зградата ни беше кажано дека со усна наредба е забранет влез за мене и мојот тим во просториите. Јавно прашувам како може некој да биде над законот и да забранува влез на претходно договорен состанок? Ова е класично злоупотребување на функцијата на командирот што е поставен од Петре Шилегов? Од што се плаши Шилегов, јавно нека каже?“, прашува Арсовска.
Град Скопје реагира на намерата одредени кандидати да ја злоупотребуваат противпожарната бригада за изборни цели.
„На партиските кампањи никогаш не им било местото во просториите на Хероите на Градот и тоа не смее да се промени за овие локални избори. Просториите на ПП бригадата во Автокоманда се стратешки безбедносен објект за Градот Скопје и мора да биде функционален и во припремна состојба во секое време. Според тоа, тоа не е место за никакви партиски собири или состаноци со кандидати со некои пожарникари. Апелираме Пожарникарите да бидат изоставени од партиските препукувања и да бидат оставени на мира да си ги извршуваат секојдневните обврски. Синдикалните организации имаат право да се среќаваат со кого сакаат, се додека за тоа не ги користат просториите на противпожарната бригада на Град Скопје“, стои во реакцијата.
ЗЕЛЕН ХУМАН ГРАД
Зелен хуман град ќе дава маички со секоја донација од 300 денари на трансакциската сметка на ЗХГ.
„Биди кул и поддржувај нè! Маичките се унисекс во големина S, M, L или XL“, велат од ЗХГ.
СДСМ
Од СДСМ велат дека се партнер на младите и на централно и на локално ниво, се отвораат младински центри и младински локални совети во сите општини.
„Во Скопје го воведуваме проектот Смарт сити, Скопје без шалтери. Со Смарт сити, Скопје сите услуги ќе ги дава онлајн и со тоа станува првиот целосно дигитализиран град во регионот. Со Смарт сити, граѓаните, младите, директно и сами одлучуваат за тоа каде и како се вложуваат нивните пари. Преку апликацијата „Мое Скопје“ на својот мобилен телефон, младите ќе можат да гласаат за предлози, да дефинираат приоритети и со тоа самите да ги креираат политиките во градот“, велат од СДСМ.
ВМРО-ДПМНЕ
Потпретседателот на ВМРО-ДПМНЕ, Александар Николоски, истакна дека СДСМ и ДУИ преку обвинителството во Тетово си нарачуваат извештај каков што им одговара со цел да скријат одговорност за починатите 14 лица во модуларната болница во Тетово.
Тој нагласи дека од одговорност не може да избегаат и одговорност ќе се случи после овие локални избори после кои ќе има и ново парламентарно мнозинство, затоа што 14 човечки животи кои беа загубени не можат да завршат со некаков кабел кој не бил исправен.
ДУИ
Градоначалникот на Чаир и кандидат на ДУИ, Висар Ганиу денеска во Старата чаршија се сретна со еснафите, пред кои даде отчетност што направила општината во негова насока за чаршијата во изминатите четири години.
„Во текот на овие 4 години организиравме 137 витрини на чаршиски продавници. Овој проект го започна Општина Чаир во рамките на своите проекти за ревитализација на чаршијата, како од економски, така и од естетски аспект. Сите овие витрини се направени од дрво, во тој случај се обидуваме да ги отстраниме сите витрини од пластика или алуминиум со цел да го вратиме автентичниот изглед и еколошкиот концепт на овие витрини “, рече Ганиу пред народот. Ганиу информираше дека во следниот мандат, предвидува уште 450 витрини каде ќе се постигне целосна обнова на Чаршијата.
АЛИЈАНСА ЗА АЛБАНЦИТЕ
Од Алијанса за Албанците велат дека актуелниот градоначалник на Струга, Рамиз Мерко, заедно со други функционери на неговата партија ДУИ на стружани им ветија неколку пати дека ќе го поправат овој објект, дека ќе изградат нова болница во Струга, дека ќе ја распоредат болничката установа од срцето на градот, но, се е оставено на место.
„Болницата е таму, во таква бедна и катастрофална состојба, предизвикувајќи хаос во секоја сфера од животот во нашиот град. Додека Рамиз Мерко и неговите пријатели се фалеа дека наскоро ќе започне изградбата на новата Болница во Струга, дали знаете што се случи? Дрвјата беа исечени и уништен единствениот парк во болницата и таму беа изградени модуларни објекти, ковид центри од пластика, кои видовме како завршија во Тетово во текот на минатиот месец. 14 луѓе беа изгорени живи, се уште никој не одговорил, додека најлошото, нема гаранција дека истото не може да се случи и во други модуларни центри, како овој во Струга“, велат од Алијанса.
СРЕДБИ СО ГРАЃАН(К)ИТЕ
Денеска СДСМ е во Аеродром, Гази Баба, Петровец и Илинден. На сите собири учествуваат лидерот на СДСМ или високи партиски функционери.
ВМРО-ДПМНЕ денеска е во Бутел, Чаир и Центар. На сите собири, исто така, учествува партискиот врв.
ДОМ и ЛДП организира онлајн трибина на тема „Во какво Скопје сакате да живеете?“
Зелен хуман град е на среба со граѓан(к)ите на ул.„Џон Кенеди“ во Скопје.
СЕЛЕКЦИЈА НА ИЗБОРНИТЕ НАБЉУДУВАЧИ НА ЦИВИЛ
Откако заврши процесот на аплицирање, во тек е селекција на краткорочните набљудувачи на ЦИВИЛ, кои ќе го набљудуваат гласањето за локалните избори на 17 октомври.
Сите кандидати ќе бидат известени дали нивните апликации се прифатени или не најдоцна до утре, 6 октомври.
Веднаш потоа ќе следат информации за тоа како и каде ќе се одржат обуките.
ИЗБОРЕН РАПОРТ НА ЦИВИЛ
Деветтото издание на Изборниот рапорт на ЦИВИЛ денеска носи наслов „Фејсбук, КОВИД-19, злоупотреби, фингерпринт и селекција на набљудувачите“.
Д. Муратов