Кратката средба меѓу македонскиот министер за надворешни работи Тимчо Муцунски и новата бугарска министерка за надворешни работи Велислава Петрова-Чамова, одржана на маргините на Советот за надворешни работи на Европската Унија во Брисел, отвори нова дипломатска полемика меѓу Скопје и Софија. Иако разговорот траел едвај една минута и бил неформален, различното претставување на настанот од двете страни повторно ги изнесе на површина длабоките несогласувања околу идентитетот, јазикот и евроинтегративниот процес на Македонија.
Додека бугарската министерка ја оцени размената на зборови како „преубава средба“, Муцунски реагираше дека не станувало збор за официјална билатерална средба, туку за краток разговор во присуство на повеќе европски дипломати. Од македонска перспектива, ваквото претставување се толкува како обид Софија да испрати порака за активен дијалог и позитивна комуникација, иако суштинските разлики остануваат непроменети.
Најсилни реакции предизвика употребата на терминот „северномакедонски“ од страна на Петрова-Чамова. Муцунски јавно порача дека „Македонците се Македонци“, оценувајќи дека таквата терминологија е неприфатлива и навредлива за националниот идентитет.
Во Брисел, Петрова-Чамова повтори дека Бугарија нема да отстапи од условите поврзани со европскиот пат на Македонија. Софија инсистира на внесување на Бугарите во македонскиот Устав, целосна имплементација на Договорот за добрососедство од 2017 година, спроведување на билатералните протоколи, мерки против говорот на омраза и отворање на историските архиви.
Бугарската дипломатија веќе подолго време настојува овие прашања да ги претстави како европски, а не како билатерален спор. Со тоа, Софија ја користи преговарачката рамка на Европската Унија како механизам за дополнителен политички притисок врз Скопје.
Настанот предизвика реакции и на домашната политичка сцена. Лидерот на СДСМ, Венко Филипче, оцени дека владата на Христијан Мицкоски се обидува да ја минимизира тежината на пораките што доаѓаат од Софија. Според него, без разлика дали станува збор за формална или неформална средба, бугарските позиции остануваат исти и претставуваат сериозен предизвик за македонската дипломатија.
Тензиите меѓу Скопје и Софија значително се продлабочија кога Бугарија го блокираше почетокот на преговорите на Македонија со Европската Унија. По силен европски притисок беше прифатен т.н. „француски предлог“, со кој бугарските барања станаа дел од преговарачката рамка на ЕУ.
ЦИВИЛ Медиа Деск
