Потпретседателка на Државната комисија за спречување на корупцијата (ДКСК) Катица Николовска, на јавната дебата „Локални избори 2021 – Интегритет на изборниот процес и интегритет на учесниците” во организација на ДКСК, рече дека поради тоа што речиси секоја година се одржуваат некакви избори, партиите стануваат доминантни во секојдневниот живот на граѓаните и влијаат врз креирање на мислењето или на нивното однесување.
– Ако политичките партии се креатори на начинот на живеење и однесување во една држава преку законите кои ги креираат и ги носат, и како и сите други треба да ги почитуваат и применуваат, зошто пред секои избори се изнаоѓаат начини, и сето она што не е со закон забрането, станува редовна пракса за промовирање на некои проекти, партиски активности и пред официјално да започне изборната кампања, праша Николовска. Со слични констатации претходно излезе и ЦИВИЛ, на онлајн прес конференција одржана на 21 септември.
Партиите, за да добијат што поголем број гласови, често пати даваат ветувања кои не се реални или се тешко изводливи. Уште повеќе што во програмите остануваат како жив доказ за нивното лошо планирање, односно за активности кои не се реализирани, потенцираше Николовска.
Таа денеска, на јавната дебата посветена на претстојните локални избори, посочи дека дел од градоначалниците со пари на општините вршат набавка на гориво за во приватни возила, кои ги користат за изборни активности.
– Знаејќи дека ДКСК воспостави механизам да следи дали службените возила се користат за потребите на изборите, некои од градоначалниците трошат општински пари за набавка на гориво, кое се точи во други приватни возила, кои се користат во партиски активности, коишто се почнати предвреме.
Таа рече дека ДКСК ги следи сите дојави за точење гориво од општински пари во изборни цели, ги евидентира, нотира, и согласно надлежностите на Комисијата, ќе се оцени дали има потреба од отворање на предмет, постапување и соодветно санкционирање.
– Сите дојави кои ќе пристигнуваат до нас во текот на овој изборен процес, понатаму ќе претставуваат иницијатива да креираме нови механизми за следење на сите средства, не само со кои располагаат општините, туку и другите институции, да ги направиме транспарентни во делот на трошењето на буџетски пари во предизборниот и изборниот процес, истакна Николовска.
Од ДКСК сметаат дека донекаде успеале да го решат проблемот со користење на службени возила за партиски активности и дека останува уште да се најде начин да се спречи користењето на горивото платено со општински пари а користено за приватни возила.
Како и предходно на прес конференцијата на ЦИВИЛ, и ДКСК констатира црна кампања во изборниот процес.
Потпретседателката Ниоловска се осврна и на негативната кампања, каде наместо да се зборува за тоа што се планира за во иднина, се фокусира на создавање црна слика за личноста, а со тоа на партијата. Николовска забележа и дека со користење на новите технологии за кампањи, како што се социјалните мрежи, портали.тие најчесто се употрбуваат за црна пропаганда, за оцрнување на некоја личност, односно за членови на ривалските партии.