Индексот на перцепција на корупцијата на Транспаренси Интернејшенел покажува дека, со освоените 35 индексни поени, Република Северна Македонија стагнира во борбата против корупцијата, но едновремено бележи и пад од 5 места на ранг листата на земјите. Според методологијата, за оценката на Северна Македонија користени се 7 извори на податоци, а според моменталните расположливи информации пад е забележан во областите на владеење на правото и на човековите права и слободи, соопштува Државната комисија за спречување на корупција во врска со перцепцијата на корупцијата на Транспаренси Интернејшенел.
Од ДКСК велат дека она што навистина загрижува и што со години наназад се случува е недостигот на ефикасност во справувањето со корупцијата, иако декларативноста е секогаш високо изразена.
„Но за ефикасна борба покрај нормираниста и декларативноста неопходни се и адекватни ресурси на надлежните институции и надзорни тела и што е уште поважно, посветеност и проследување на случаите на корупција и судир на интереси. Влијанието на политиката, злоупотребите на службената положба и овластувања, непотизмот, клиентелизмот и кронизмот се сè уште широко распространети. Делувањето на ДКСК, покрај другите надлежности е особено насочено и во овие области кои се препознаени како високоризични и се дел од мерките утврдени во Националната стратегија за спречување на корупцијата и судирот на интереси 2021-2025“, се вели во нивното соопштение.
Нагласуваат дека за успешно завршување на детектираните случаи и надминување на воспоставените негативни состојби неопходна е и спроведливост на нејзините препораки, укажувања и иницијативи од страна на надлежните институции.
„Но за успешно завршување на детектираните случаи и надминување на воспоставените негативни состојби неопходна е и спроведливост на нејзините препораки, укажувања и иницијативи од страна на надлежните институции. Токму тоа е констатирано и препорачано и во последниот извештај на Европската комисија за напредокот од 2020 година“, соопштува ДКСК.
Два неславни рекорда сруши Македонија на Индексот за перцепција на корупцијата за 2020 година на Транспаренси Интернешнл (ТИ). Заедно со Босна и Херцеговина, Македонија се наоѓа на 111 место од вкупно 180 рангирани држави на овој индекс. Воедно, на Индексот за 2020 година Македонија го бележи најнискиот резултат и најниското рангирање досега од 2001 година, кога бевме за првпат рангирани на Индексот за перцепција на корупцијата, информираат од Транспаренси Интернешнл-Македонија.
Сепак, од Транспаренси Интернешнл велат дека земјава лани имала непроменет број на поени во споредба со 2019 година, односно 35. Тоа што се нашла со ист број на поени подолу на листата на Индексот за перцепција на корупцијата значи дека други земји низ светот лани оствариле подобри резултати во борбата против корупцијата. Заедно со Македонија и Босна и Херцеговина, со идентичен број на поени сме во групата со Монголија и Панама.
За формирање на резултатот користени се податоците од 7 истражувања спроведени во последните две години. Станува збор за нови истражувања спроведени во 2019 и 2020 година, од релевантни организации и на основа на утврдена и проверена методологија. Притоа, не се забележани големи осцилaции во однос на бодувањето од минатата година.