До Управниот суд досега за парламентарните избори 2024 година, е пристигната една тужба против одлуката на Државната изборна комисија од коалицијата ВЛЕН. Тужбата, се однесува на одлуката на ДИК за гласањето во долна Бањица, гостиварско. Претпладнево тужба против одлуката на ДИК ќе биде упатена до Управниот суд и од ДУИ, за сите седум места каде што е поништено гласањето.
На веб – страната на Управниот суд е објавено дека ја известува јавноста дека синоќа во 22:33 часот, по поднесена тужба од Коалиција Влен на Парламентарните избори 2024 против Одлука на Државна Изборна Комисија УП1 бр.10-14 од 14.05.2024 година, оформен е предмет УРП.бр.86/2024. По поднесената тужба, Управниот суд ги презема сите процесни дејствија согласно роковите определени во Изборниот законик. Крајниот рок за овој предмет истекува на полноќ.
Откако беше поништено гласањето во шест избирачки места во ИЕ5 и едно во ИЕ 6 и стана јасно дека се загрозени два мандати на ДУИ, Османи на средба со неколку амбасадори реагираше на работата на Државната изборна комисија.
Тој најави дека Европскиот фронт ќе ги обжали одлуките на ДИК во Управниот суд и ќе поднесе пријави за членовите на комисијата за кршење на правото на гласачите да ја изразат слободната волја. Ваквиот став тој им го пренел и на амбасадорите на четири странски држави – САД, Германија, Обединетото Кралство и Холандија, со коишто имал средба. Во разговорите Османи изразил загриженост за „компромитирање на изборниот процес со самоволните одлуки на ДИК, со цел да се украде изборната волја со правење политички инженеринг со одлуките за прегласување“.
Од Европскиот фронт сметаат дека со „оркестрирани чекори“ се прават напори да им се одземат еден до два пратеника и да не се дозволи тие да бидат втората политичка сила во Северна Македонија.
Од коалицијата „ВЛЕН“ завчера истакнаа дека Европски фронт ја искривил волјата на граѓаните, додавајќи дека таканаречениот Европски фронт, злоупотребувајќи ги сите механизми на владеењето, незаконски ја нарушил и искривил волјата на граѓанинот, спроведувајќи го „бугарскиот воз“ како што се случаите веќе потврдени со одлука на ДИК во Липково и Ларце, како и броењето на неважечки гласови во корист на Фронтот и ДУИ.
Државната изборна комисија ќе ги чека решенијата на Управниот суд, но исто така утре ќе треба да почне да се подготвува за прегласувањето што треба да се одржи во среда на 22 мај.
Н. Абдурахмани
