По бруталниот напад во саботата, 18 мај, по сите перипетии околу неговото одложено хоспитализирање и опасноста по живот што сè уште е присутна, Бранко Петровски, утре излегува од болница на домашно лекување.
Опасноста според лекарите не е надмината, но сега за сега здравствената состојба на Петровски е стабилна. Две недели по нападот на бизнисменот Спиро Чорогунов врз него, правда за Петровски нема ни на повидок. Институциите премногу бавно реагираат на бруталниот атак од бизнисменот што ги поседува хотелите „Александар Сквер“, „Александар 2“, ГП „Караорман“ и други бизниси врз мирниот комшија Бране, како што го знаат во соседството.
По поднесената кривична пријава, Министерството за внатрешни работи чека на одлуките на Јавното обвинителство, а за било каква процедура се чека и на лекарско уверение што докажува за тешката состојба на Петровски, а која семејството сѐ уште не ја добило, а институциите (МВР, обвинителство) не ја побарале по службена линија.
Сепак, поддршката за Петровски и неговото семејство е огромна. Јавноста, револтирана од постапката на човекот што, по крвничко претепување на својот сосед, спокојно оди на свадба, додека жртвата буквално се гушеше во сопствената крв ноќта по нападот.
Во јавноста е позната и поврзаноста на напаѓачот со некои од влијателните луѓе од режимот на Груевски, со кои правдата сè уште војува, за сега, не многу успешно.
Според очевидци, Чорогунов го извршил нападот врз Петровски во најнепосредна близина на хотелот „Александар 2“, кој се наоѓа во непосредна близина и на кафулето „Гарсон“ и на менувачницата. Тешкиот инцидент се случил среде бел ден во строгиот центар на градот, кога Чорогунов му ја фрла малата табла со реклама за менувачницата што таму стои цели 19 години. Откако Петровски се обидува да ја врати таблата, Чорогунов го нападнал со тупаници, го кутнал на земја и продолжил силно да го удира во пределот на лицето, со што му нанел скршеници на вилицата, носот и во пределот на десното око. Петровски е познат како ненасилен, добар и љубезен сосед, кој минатата година извојува и битка против ракот. Семејството Петровски им пренесе на претставниците на ЦИВИЛ што го следат случајот, дека се бескрајно благодарни за изразите на поддршка што ги добиваат од безброј луѓе во текот на овие тешки денови за нив.
На ред се институциите.
