Претседателот на Република Српска Милорад Додик изјави дека лично нема да се жали на пресудата со која е осуден на една година затвор и шестгодишна забрана за вршење политички функции и изјави дека Народното собрание на Република Српска донело одлука да го отфрли судскиот процес против него пред Судот на Босна и Херцеговина, јавува Еуроњуз, пренесе ЦИВИЛМедиа.
„Дали адвокатите од свои причини ќе измислат нешто на тој фронт, подобро да не ме прашувате, бидејќи ќе бидам против тоа. Ако мислат дека треба да се исполни нешто поради правната форма, за да одат во Стразбур, тоа е нивен проблем. Мислам дека не се жалам лично, ниту мислам дека повеќе ќе го правам тоа“, изјави Додик.
Тој посочи дека одлуките на Народното собрание на РС се враќање на Дејтон и одбрана на Дејтонскиот мировен договор.
„Она што го имавме досега е суровата сила на меѓународниот фактор и ароганцијата на муслиманите од Сараево“, посочи Додик.
Тој вели дека денеска во БиХ не се почитува писмото од Дејтонскиот мировен договор и дека Српска бара враќање на првобитниот Дејтон.
„БиХ го нема својот територијален интегритет според оригиналниот Дејтон, туку припаѓа на ентитетите кои ја сочинуваат БиХ. Затоа во членот три од Уставот се вели дека БиХ се состои од два ентитета и три конститутивни народи. Тука го достигнуваме суверенитетот“, рече претседателот на РС.
Додик повтори дека е избран за претседател со легитимитетот што го добил на демократските избори и дека со Уставот е задолжен да ја штити и претставува Република Српска.
Д. Т.
