Дел од медиумите во Република Македонија ја информираа јавноста дека во касарната во Тетово, во еден од хангарите, додека го чистеле оружјето, биле повредени двајца војници на Армијата на Република Македонија. Со цел да дознаам нешто повеќе за настанот, го пребарав сајтот на Министерството за одбрана и страната на АРМ, за жал немаше дополнителни информации. Впрочем, и во медиумите, како извор на информации за настанот, беа спомнати медицинските институции каде што се згрижени војниците, но не и од надлежните каде што се случил настанот.
Во формацискиот состав на Генералштабот постои канцеларија за односи со јавноста која требаше да ја информира јавноста за тоа што навистина се случило. Сето ова ме потсети на еден настан во Националната Гарда на Вермонт од 14 март годинава. Таму, за време на вежбовна активност во планински терен, од лавина биле повредени шест војници, а јавноста беше информирана во истиот момент. Секојдневно, на официјалниот Фејсбук профил на Националната гарда се објавуваа информации за здравствената состојбата на војниците.
Кај нас, за жал, додека војниците се борат за својот живот, од Генералштабот молк.
Веројатно се молчи, затоа што секој професионалец кој ги познава стандардните процедури за време на вежбовните активности, а пред сè постапките кои морало да се спроведат по завршената активност, знае дека оклопен транспортер со наполнет митралез никако не смеел да ја напушти вежбовната територија и да учествува во јавниот сообраќај од Штип до Тетово. Веројатно, не се почитувани ни стандардните процедури при симнувањето и преносот на митралезот во хангарот во касарната во Тетово, каде што се случил настанот.
Во некои други времиња, од пред само неколку години, додека се почитуваа одредени вредности и генералите се унапредуваа според заслугите, а не по родински и пријателски врски, генералите ќе беа цел ден пред операционите сали и ќе се грижеа за војниците. Срамно и непрофесионално е, додека војниците се во операциона сала и се борат за својот живот, генералите да се пијанчат во касарната во Куманово и да го прославуваат унапредувањето на Зоран Милески во повисок чин.
Можете да се удирате во гради и да се фалите со унапредувањата, но со својот непрофесионализам и односот кон војниците покажавте дека не заслужувате да ја водите Армијата. Зарем треба да ве потсетам дека вашето место по настанот беше во здравствената установа, каде се згрижени војниците и заедно со семејствата на повредените војници да преземете мерки да ја добијат најдобриот здравствена нега, со цел од здобиените повреди да не останат последици по здравјето на вашите војници?
За разлика од вас, Министерката за одбрана најде време и ги посети војниците.
Грижата за војниците не се покажува со тоа што ќе се натпреварувате кој повеќе ракија или пиво ќе испие, грижата се покажува со тоа што ќе бидете со војниците. Да бевте со војниците на обуката, на спортските активности или на стражарските места, ќе знаевте дека војниците носат искинати чизми и униформи, за спортска опрема ги користат војничките пододела и други делови од униформа, а на стража се хранат со сендвичи кои сами си ги купуваат, оти храната која ја обезбедувате е еднолична.
Дали треба да ве прашам кога последен пат некој од вас одиграл партија шах, баскет или фудбал со некој од војниците? Веројатно никогаш.
Од овој настан треба да ја научите основната војничка лекција, дека генералите се во армијата затоа што има војници, а не спротивно, војниците затоа што има генерали.
На повредените војници од сè срце им посакувам што побрзо здрави и без последици да се вратат на своите работни места.
Авторот е магистер по национална безбедносна стратегија и полковник во пензија.
Услови за користење, авторски права и заштита на приватноста
Преземање на содржините под различни услови од наведените не е дозволено, освен со писмена дозвола од ЦИВИЛ.