„Припадниците на победничката страна на овие избори треба да се воздржат од користење агресивни славенички термини од типот “ги згазивме”, “газење” и “дробење” бидејќи целта на изборите не е било кој да биде згазен или здробен“, напиша Марјан Забрчанец на својот фејсбук профил. И во право е човекот.
Свесни сме дека овие избори беа повеќе од локални и дека нивните резултати значат многу повеќе од тоа кој ќе добие атмосферска канализација, а кој ќе добие осветлени улици во наредните четири години. Токму затоа многу е важно оваа победничка еуфорија и триумфализам конечно да прерасне во нешто повеќе од неколку сочни и аресивни флоскули напишани на социјалните мрежи.
Да, важно е да се каже дека конечно клекнавме на нозе еден режим кој системски нè уништи, но оваа еуфорија ми се чини трае предолго.
Сега веќе не е време за докажување кој бил поголем, погласен и пошарен низ годините наназад, сега е време кога таа енергија да се пренасочи во нешто конструктивно, наспроти сета деструктивна реторика својствена за режимот. Можеме да покажеме дека сме поголеми од тоа. Можеме да покажеме дека знаеме поинаку.
Или како што пишува Забрчанец „ни едно граѓанско ‘газење’ не може да донесе суштинска промена во општеството за кое се заложивме да го менуваме“.
Редно време е за промени, реални промени кои се постигнуваат со работа!
М. Ивановска
