ВЕСТ НА ДЕНОТ: Заев ги достави до Собранието предлог составот и програмата на новата Влада
Претседателот на СДСМ, Зоран Заев денеска во 11 часот го достави до Собранието предлог составот на новата Влада и програмата за нејзината работа.
„Денес во Собранието доставив предлог Програма за работа и предлог состав на новата влада на Република Северна Македонија. На изборите граѓаните го потврдија правецот и ставот кој денес го преточуваме во конкретни кадри и програма. Македонските граѓани ќе добијат одговорна влада која ќе гарантира континуитет во остварување на стратешките приорити, членството во НАТО, преговорите со ЕУ, добрососетски односи… Денеска, како мандатор доставив до Собранието предлог за влада која е подготвена да сработи во полн 4 годишен мандат. Со мене се 19 инистри и министерки со кои се обврзуваме дека ќе работиме уште повеќе и уште подобро“, рече Заев.
ФЛЕШ ВЕСТИ
Зоран Заев истакна дека помалкубројните етнички заедници како што се Турците, Ромите, Бошњаците, Србите, Власите итн., ќе бидат застапени во сите институции, односно ќе има заменици министери, државни секретари, директори, раководители на големи и сериозни институции…
Советникот на ДУИ во Општина Охрид, Нефи Усеини од претпладнево заедно со брат му се во затворот во Охрид, откако Јавното обвинителство им определи мерка притвор од 8 дена, за нападот врз Спиро Топалкоски, потврдија од МВР за ЦИВИЛ Медиа.
Новата учебна година дефинитивно ќе започне еден месец подоцна, на 1 октомври, поради пандемијата на коронавирусот. Мандатарот Зоран Заев на денешната прес-конференција, по доставувањето на предлогот за новата влада во Собранието, најави такво решение, кое техничката влада предводена од Оливер Спасовски во меѓувреме го усвоила.
Куманово станува седиште на една од најзначајните регионални иницијативи, Бригадата на Југоисточна Европа и во следните шест години, ова ќе биде местото каде што ќе биде лоцирана оваа Бригада како главен дел од иницијативата која што е почната пред 22 години во Скопје и во која што како држава ги учевме првите лекции за развој на заеднички одбранбени капацитети.
Тоа го истакна министерката за одбрана Радмила Шекеринска која денеска, во пресрет на вечерашната свеченост, го посети објектот во кој до 2026 година ќе биде стационирана Командата на Бригадата на Југоисточна Европа (SEEBRIG), формирана со договорот потпишан во Скопје во 1998 година.
Судењето за организаторите на настаните од 27 април во Собранието продолжува на 4 септември со сослушување на сведоци предложени од одбраната на поранешниот собраниски спикер Трајко Вељановски.
Судскиот предмет за петкратното убиство во Смилковско Езеро во април 2012, познат како „Монструм” денеска продолжи во Кривичниот суд Скопје.
Мрежата за заштита од дискриминација бара од Собранието изборот на Народниот правобранител да биде еден од приоритетите на новиот парламентарен состав, да биде спроведен транспарентен и фер процес на селекција на кандидатите, ослободен од влијанието на политичките партии и да биде извршен избор на компетентен и соодветен кандидат/ка.
Денеска се одбележуваат 110 години од раѓањето на Мајка Тереза.
СЛОБОДНА ЗОНА
„Еврејската заедница во Бугарија го квалификува како „антисемитизам“ и реагира остро против Каракачанов и неговите етикетирања на луѓе од граѓанските движења како „соросоиди“. Кај нас, етикетирањето како „соросоиди“ на луѓе, па и на многу луѓе кои немаат никаква врска со фондацијата на Џорџ Сорос, трае со години. Досега не се сеќавам дека сум чул реакција на оваа тема од еврејската заедница во Македонија“, пишува Петрит Сарачини во Да не треба да му се извиниме на Грујо што ги браневме „соросоидите“?
А. Петровска
