Претседателот на ЦИВИЛ – Центар за слобода, Џабир Дерала, на дебатата посветена на прашањето каков попис и Избирачки список и се потребни на Македонија, во организација на НВО Инфоцентар, истакна дека може да се спроведат минимално фер избори, доколку се исклучат од изборниот процес сите политичари за кои има тенденции дека извршиле криминално дело.
„Државата, користејќи своите инструменти, во изминатите години направи сериозни дејствија коишто Избирачкиот список го сведоа на еден алваџиски тефтер кој може лесно да се злоупотреби, и преку него, да се манипулира со правото на гласачите на Република Македонија. Во изминатите години, а и последниве месеци, додека се правеше обид да се легитимира Државната изборна комисија, дојдовме до фрапантни податоци… Не зборуваме веќе за еден „фолклор’ – некој направил некој трик со којшто ја заобиколил законската регулатива, ние зборуваме за институции кои системски, користејќи ги законите и процедурите, а пред сé, користејќи го персоналот, внесувал лажни податоци и ја создал забуната. И овој лавиринт во кој сега се наоѓаме. ДИК во овој процес го загуби легитимитетот, затоа што не успеа да се издигне над политичките интереси. Внатре имаме партиски борби, наместо да имаме професионално тело коешто ќе се занимава со Избирачкиот список и со сите останати не помалку важни компоненти кои се во тажна состојба веќе со години“, истакна во еден дел од своето излагање Дерала.
Камера: Дехран Муратов
