ДУИ: Стоилковиќ ја претстави Владата рамо до рамо со Русија, Кина и локалните инсталации од српскиот и рускиот свет, во одбрана на руската агресија врз Украина

Демократската унија за интеграција испрати соопштение во кое остро реагира на неодамнешните хибридни дејствија на инсталациите „Српски свет“ во рамките на Владата, кои јавно и со целосен институционален капацитет, во име на самата Влада, ги промовираат и бранат руските наративи во земјата.

Според ДУИ, овој преседан претставува директен судир со позициите на НАТО и со јасните насоки утврдени во декларациите усвоени со консензус од страна на Советот на Северноатлантскиот сојуз, за ​​кои нашите претставници редовно гласаа до денес.

Всушност, заштитата од руски манипулации и малигни влијанија е идентификувана, верификувана и оценета од самиот НАТО како директна закана за процесот на политичко донесување одлуки во земјите-членки и како сериозен ризик за единството на Алијансата.

Република Северна Македонија се обврза кон своите сојузници дека ќе ги стави на располагање сите капацитети и механизми за заштита од овие влијанија, не само на нејзината територија, туку и како активен партнер во целиот регион на Западен Балкан, потдетуваат од ДУИ.

Вицепремиерот, кој иронично е одговорен за спроведувањето на Рамковниот договор од Охрид, и кој наредува разрешување на Албанци од високи позиции во администрацијата, очигледно ужива поддршка од премиерот Христијан Мицкоски за сите свои постапки, нешто што го видовме и претходно кога им делеше „жолти картони“ на Албанците кои Стоилковиќ ги таргетираше како „зрели“ за разрешување.

Но, во најновиот инцидент, Стоилковиќ ја претстави Владата како стои рамо до рамо со амбасадорите на Русија, Кина и други стратешки земји-партнери, но и со голем број локални инсталации од српскиот и рускиот свет, во одбрана на руската агресија врз Украина.

И во овој случај, како што велат интегративците, премиерот се појави во улога на релативизатор на овој опасен тренд, повторно бранејќи го својот фаворит во Владата.

Сегашниот став на Владата претставува опасен преседан, преку кој се прави обид за „нормализирање“ на промена во официјалната политика на државата, со цел оддалечување од јасната евроатлантска ориентација и приближување кон алтернативни центри на политичка моќ, предводени од Пекинг и Москва, се вели во соопштението.

Реакцијата на ДУИ доаѓа откако потпретседателот на Владата, министерот за односи меѓу заедниците Иван Стоилковиќ, пред 2 дена присуствуваше на приемот по повод Денот на Русија во амбасадата на Руската Федерација во Скопје.

Покрај Стоилковиќ, гости на рускиот амбасадор Баздникин беа и Архиепископот на Македонската православна црква – Охридска архиепископија Неговото Блаженство г.г. Стефан, Митрополитот Преспанско-пелагониски Петар, Митрополитот Тетовско-гостиварски Јосиф, Митрополитот Кумановско-осоговски Григориј, Митрополитот Дебарско-кичевски Георгиј, Епископот Хераклејски Климент.

На настанот присуствуваа и пратениците на Собранието Сашко Јанчев, Јована Мојсоска и Драган Недељковиќ, Амбасадорката на Србија Невена Јовановиќ, Амбасадорот на Босна и Херцеговина Драган Јаќимовиќ, Амбасадорот на Турција Фатих Улусој, Амбасадорот на Казахстан Сатибалди Буршаков, вршителот на должноста Амбасадор на Кина Су Леи, вршител на должноста на Амбасадор на Катар Рашид Саид Ал Хаjарин, Почесниот конзул на Русија во Охрид Велимир Стојковски, претставници на општини, членови на политички партии, академици и научници, јавни и културни дејци, претставници на руски компании во Македонија, домашни бизнисмени, медиуми, активисти на здруженија за македонско-руско пријателство…

Д. Мишев

.