Две милијарди денари за над 15.000 невработени лица се предвидени со годинашниот Оперативниот план за активни програми и мерки за вработување и услуги на пазарот на трудот. Како што беше речено на денешната промоција под мотото „Шанса за сите“, поддршката за отворање сопствен бизнис, како една од најбараните во Оперативниот план, ќе опфати околу 2 000 лица.
-Планот оваа година опфаќа 15 244 крајни корисници од кои 11 622 лица во мерки за вработување и 3 622 со услуги. Во креирањето на Оперативниот план главна цел е воспоставување функционална и флексибилна платформа за имплементација на мерки и услуги, при што ќе се понуди шанса за сите. Во дефинирањето на содржините, како општо правило се настојуваше да се постигне еднаква застапеност на мажи и жени, како и учество на младите лица до 29 години од најмалку 30 проценти. Ранливите категории на невработените лица останува уште еден од приоритетните цели на Оперативниот план, со што се потенцира општата заложба за еднакви можности за сите, рече министерот за труд и социјална политика во техничката Влада, Ѓоко Велковски.
Оваа година, додаде, посебен фокус ќе биде ставен на поддршката на развојот на домашните претпријатија, пред сѐ на микро, малите и средните бизниси, како и на обезбедување соодветна работна сила преку различните видови обуки во реални работни услови.
-Дигиталната трансформација и воведувањето нови зелени инвестиции, исто така се во фокусот на Оперативниот план за вработување, напомена министерот.
Според него, оние што треба реално да се вработат, од државата не добиваат секогаш можност. Поддршката за бизнис секторот не им овозможува на компаниите да им дадат доволно високи плати на младите, поради што многу од нив заминуваат од земјата, но ако се гледа статистички, веќе си одат и повозрасни лица поради можноста за повисоки примања, повисоки плати и поквалитетен начин на живеење.
Директорот на Агенција за вработување, Ведат Османи потенцира дека секоја година година се одвојуваат се повеќе средства за Оперативниот план, а со тоа и се повеќе граѓани добиваат можност да се вклучат на пазарот на труд.
-Годинашниот Оперативен план сериозно ќе влијае на унапредување на состојбата на пазарот на труд во земјава. Сите 30 центри на Агенцијата за вработување се подготвени за негова реализација и се координирани со централната служба. Првите јавни огласи се веќе објавени, а останатите ќе се објавуваат етапно, подвлече Османи.
Постојаниот претставник на УНДП, Армен Григорјан истакна дека и во годинашниот Оперативен план, УНДП во партнерство со Агенцијата за вработување ќе реализира неколку клучни мерки и програми за вработување и зголемување на вработливоста со фокус на ранливите категории.
-Програмата за развој на УНДП, како долгогодишен партнер на Владата и националните институции ќе ја продолжи соработката со сите релевантни чинители преку дизајнирање иновативни механизми за поттикнување на економскиот раст и развој на приватниот сектор и обезбедување еднакви можности за сите, рече Григорјан.
Извор: МИА
