Според британскиот неделник „Економист“, со месеци долготрајните масовни демонстрации предводени од студентите, кои се покажуваат како многу отпорни, длабоко го потресоа српскиот претседател Александар Вучиќ, кој владее со земјата од 2012 година.
Во написот објавен на веб-страницата на британскиот неделник, Вучиќ е опишан како „балкански насилник“, со оценка дека е „на колена“, пренесува Н1.
Британскиот неделник наведува дека студентите во Србија мора да одлучат „дали ќе дипломираат оваа година или ќе одат до крај во обид да го соборат Александар Вучиќ од власт“.
„Студентските демонстрации што започнаа во текот на зимата не стивнуваат и станаа инструмент за изразување отпор кон претседателот. Демонстрациите досега не успеаја да го соборат од власт, но ниту тој не успеа да ги смири“, се вели во текстот „Лидерот на Србија, Александар Вучиќ, длабоко потресен“.
Во текстот, кој ќе биде објавен утре во печатеното издание на „Економист“, се потсетува дека протестите започнале откако 16 лица загинале кога паднала бетонска настрешница на железничката станица во Нови Сад.
Британскиот неделник додава дека студентите одбиле да соработуваат со добро познатите, но слаби опозициски партии, велејќи на почетокот дека сакаат само правда и подобро управување со земјата, но дека неодамна почнале да бараат предвремени избори.
Економистот наведува дека Вучиќ владее со Србија од 2012 година, бил влијателна личност и под Слободан Милошевиќ, и преживеал неколку бранови протести во претходните години, вклучувајќи демонстрации против контроверзниот план за рударство на литиум – кој Европската комисија го вклучи овој месец на списокот на проекти од стратешко значење за Европската Унија.
„Србија, кандидат за членство во ЕУ, под власта на Вучиќ успева да одржува пријателски односи со Русија, иако ја снабдува Украина со оружје. Неговата владејачка партија функционира како клиентелистички механизам – им обезбедува работни места на своите поддржувачи во замена за гласови. Исто така, ги контролира сите водечки медиуми“, се вели во текстот.
Економистот потоа наведува дека најновите протести го потресле Вучиќ и дека ги обвинува студентите дека се странски платеници и зборува за мистериозен обид за државен удар.
„Либералните невладини организации се цел на напади бидејќи добиваат средства од странство. Во последните десет години, ЕУ донираше 64 милиони евра за иницијативи на невладини организации. Но, ова е само дел од она што ЕУ ѝ го даде на владата за модернизација на Србија како целина“, се наведува во него.
Според Економист, „Егзит, голем музички фестивал во Нови Сад, кој ја врати Србија на културната мапа на светот по балканските војни, остана без државно финансирање поради поддршка за студентите, а овогодинешното издание ќе биде последно што ќе се одржи во Србија“.
Весникот пишува и дека партијата на Вучиќ едвај успеала да победи на локалните избори на 8 јуни во Зајечар и Косјериќ, каде што претходно освои речиси 80 проценти од гласовите, и дека Вучиќ затоа одбива да се согласи на предвремени избори.
Подготви: Ј. Ѓ./Фронтлајн
