ВЕСТ НА ДЕНОТ
Европските лидери постигнаа договор за ембарго за руската нафта
ЕУ лидерите го одобрија ембаргото на руската нафта испорачана со танкери, примарен метод, ефективно намалувајќи го увозот за две третини, со обврски за намалување на увозот преку гасоводи. Чарлс Мишел, претседател на Европскиот совет, го објави договорот доцна навечер на Твитер, иако многу детали остануваат да се откријат.
Војната на Русија во Украина е финансирана од продажба на сурова и рафинирана нафта и природен гас, кои претставуваат најголем дел од извозните приходи на земјата, прибрани првенствено од државните енергетски компании. Аналитичарите велат дека Русија ќе продолжи да наоѓа купувачи за својата нафта, но дека обемот на продажба и профитот веројатно значително ќе се намалат откако ембаргото ќе стапи на сила.
ИЗЈАВА НА ДЕНОТ
Зеленски: Колку поцелосно ќе биде напуштањето на руската нафта, толку поголема ќе биде придобивката за самата Европа
„Денеска во регионот на Луганск окупаторите ја прекинаа евакуацијата од областите на воените дејствија пукајќи во автомобил кој ги следеше мештаните. Францускиот новинар Фредерик Леклер-Имхоф беше убиен од гранатирањето. Работел за францускиот ТВ канал BFM TV. Пред нешто повеќе од еден месец дадов интервју за овој телевизиски канал. Ова беше моето прво интервју со француските медиуми за време на војната од целосен обем. Моето искрено сочувство до колегите и семејството на Фредерик. Тој стана 32-риот медиумски претставник убиен по 24 февруари“, изјави украинскиот претседател, Володимир Зеленски во синоќешното видео обраќање до нацијата.
Зеленски изрази благодарност на Шарл Мишел, претседател на Европскиот совет, за поддршката на интересите на Украина, интересите на цела Европа и што се обиде да ги најде потребните компромиси што е можно поскоро за да може да се усвои шестиот пакет санкции на Европската унија. Русија мора да почувствува многу повисока цена за својата агресија.
Според него, клучната точка е нафтата. Тој изрази уверување дека Европа во секој случај ќе мора да се откаже од руската нафта и нафтени деривати, затоа што се работи за независност на самите Европејци од руското енергетско оружје. И колку побрзо тоа се случи, колку поцелосно ќе биде напуштањето на руската нафта, толку поголема ќе биде придобивката за самата Европа на крајот.
ФЛЕШ ВЕСТИ
ПОСЕТА Министерката за одбрана, Славјанка Петровска, од денеска ја почнува работната посета на Соединетите Американски Држави. За време на посетата, Петровска во Пентагон ќе се сретне со потсекретарот за одбрана, задолжен за политички прашања, Колин Кал, а ќе има средби и со помошничката на секретарот за одбрана, Селесте Валандер, командантот на Националната гарда на САД, генералот Даниел Хокансон, командантот на Националната гарда на Вермонт, генерал-мајор Грегори Најт и секретарот на Копнената војска на САД, Кристин Вормунт.
УСТАВЕН СУД По вчерашната средба на шефот на државата Стево Пендаровски, премиерот Димитар Ковачевски и претседателот на Собранието Талат Џафери со претседателката на Уставниот суд Добрила Кацарска за блокадата на изборот на четири уставни судии, денеска надлежните потврдуваат дека утре или најдоцна задутре изборот на уставните судии ќе се најде на дневен ред на собраниската Комисија за избори и именувања.
ПРАВДА Апелациониот суд го потврди решението со кое е продолжена мерката притвор на поранешниот генерален секретар на Владата, Мухамед Зеќири. Од Судот за потврдија дека апелационите судии ја одбиле жалбата на Зеќири со која тој побара да биде пуштен да се брани од слобода.
КОНФЕРЕНЦИЈА Денеска се одржа конференцијата „Справување со дезинформации во Република Северна Македонија“, посветена на градење мулти-секторски пристап за решавање на овој важен проблем преку заеднички ангажман на државните институции, независните медиуми, граѓанските организации, академската заедница и приватниот сектор, во организација на Фондацијата „Метаморфозис“.
ВОЈНА ВО УКРАИНА
Американскиот Институт за проучување на војната (Institute for the Study of War) објави нова анализа и мапа на судирот во Украина. ИСВ наведува дека има несогласување во руските воени кругови и обвинувања дека Кремљ не прави доволно за да победи во војната.
Од разговорот прислушуван од Службата за безбедност на Украина, стана познато дека вооружените сили на Украина елиминирале голема единица платеници на руската група Вагнер на исток, објави Службата за безбедност на Украина на Телеграм, откако украинските бранители уништија елитна единица, „обичните“ руски војници сега се плашат воопшто да се борат.
Двајца руски војници, Александар Бобикин и Александар Иванов, кои го гранатираа регионот Харков од повеќе ракетни фрлачи Град, беа осудени на 11 години и 6 месеци затвор. Казната беше прочитана во окружниот суд Котелевски во регионот Полтава на 31 мај.
Канцеларијата на Високиот комесаријат за човекови права на ОН, во најновиот извештај на организацијата потврди 8.900 цивилни жртви, вклучувајќи 4.074 мртви и 4.826 повредени, во текот на војната што Русија ја води против Украина.
Д. Тахири
