Одлуката на Бугарија е неуспех за ЕУ, македонскиот идентитет и македонскиот јазик не се предмет на преговори, ќе продолжиме да бараме решение за нашата незаменлива европска иднина – брифираат од Владата. Во владиниот брифинг се потврдува европска ориентација, но и цврстиот став дека за идентитетот и јазикот не се преговара. Воедно, од Владата потенцираат дека нема ни трошка вистина во манипулациите кои ги пласираат дел од опозициските партии предводени од ВМРО-ДПМНЕ, за наводно „распродавање на македонскиот идентитет” и апелираат до раководството на ВМРО-ДПМНЕ да престанат да се радуваат на тешките моменти во кои се наоѓа државата и да го препознаат моментот кога одредени национални прашања ги надминуваат границите на вообичаените партиски пресметки.
До сега не се создадоа соодветни услови за да се надминат новите бугарски барања и заради тоа, Република Бугарија одлучи дека во овој момент нема да ја одобри нашата преговарачката рамка во ЕУ. Тоа е неуспех за политиката на ЕУ за проширувањето, лоша порака за целиот регион и пораз за фундаменталните европски вредности и принципи – брифираат од Владата.
„Особено сме горди и на нашата смиреност и на нашата национална и политичка големина во овој тежок период за нас. Тоа е одлика на вистински Европејци, тоа е одлика на Македонците.“
Од Владата посочуваат дека и двете држави имаат заеднички геополитички интереси. Заеднички интерес е целиот Балкански регион што побрзо да се интегрира целосно во ЕУ, да се поврзе инфраструктурно, преку Коридор 8, да се овозможи полесен проток на луѓе, идеи, стоки и капитал, да се изградат добри услови за бизнисот, да се зголемат инвестициите. „Тоа е вистински патриотизам и лидерство!“ – се вели во брифингот.
Владата изрази благодарност за зајакнатиот ангажман на германското претседателство со ЕУ, како и на личниот ангажман на канцеларката Меркел. „Вложивме сериозни дипломатски напори да создадеме услови минатото да не биде кочничар на иднината“ – велат владините извори.
Владата изрази готовност да продолжи со интензивни разговори во интерес на европската иднина на земјата, при што смета дека решение е можно само ако од тоа решение двете страни излезат како победници.
Владата истакнува дека останува на истиот стратешки колосек – ЕУ интеграција.
За крај, владините извори потенцираат дека нема ни трошка вистина во манипулациите кои ги пласираат дел од опозициските партии предводени од ВМРО-ДПМНЕ, за наводно “распродавање на македонскиот идентитет”.
„Апелираме до раководството на ВМРО-ДПМНЕ да престанат да се радуваат на тешките моменти во кои се наоѓа државата и да го препознаат моментот кога одредени национални прашања ги надминуваат границите на вообичаените партиски пресметки“ – се заклучува во владиниот брифинг.
