ВЕСТ НА ДЕНОТ
Управата за финансиска полиција поднесе кривична пријава до ОЈО Скопје
Управата за финансиска полиција денеска поднела кривична пријава до Основното јавно обвинителство Скопје во која, како што информираат, се опфатени сите обвинители за кои сметаат дека постојат основи на сомнение за сторени кривични дела при постапување во предметот по кој беше извршен претресот во Управата.
ИЗЈАВА НА ДЕНОТ
ВОЈНА ВО УКРАИНА
За да организираат лажен референдум во регионот Керсон, руските напаѓачи се обидуваат да ги купат „гласовите“ на локалните жители.
„Окупаторите сакаат да ги „купат“ гласовите на жителите на регионот Керсон пред да одржат лажен референдум“, објави Регионалната воена управа на Керсон на Фејсбук.
*
Зборувајќи за „саботажа“ од украински учители во окупираните области на регионот Запорожје, пропагандистот Сергеј Мардан предложи Русите да прибегнат кон тортура и убиства на Украинци, како и да изградат работен логор од типот Гулаг за пркосните учители. Соодветното видео од радио емисија на руското радио Комсомолскаја Правда е достапно на ЈуТјуб
*
Меѓународните инспектори треба да добијат пристап до нуклеарната централа Запорожје, побара во понеделникот (8-ми август) генералниот секретар на ОН, Антонио Гутереш, откако Украина и Русија меѓусебно се обвинија за гранатирање на објектот.
*
Никој во светот не може да се чувствува безбеден кога терористичката држава – Русија – ја гранатира нуклеарната централа Запорожје, и во моментов е потребен принципиелен одговор од меѓународната заедница на руските напади, изјави украинскиот претседател Володимир Зеленски во своето синоќешно видео обраќање.
ФЛЕШ ВЕСТИ
ПРИМИРЈЕ Примирјето меѓу Израел и Исламскиот џихад, што стапи на сила доцна синоќа, траеше во текот на ноќта, а израелската армија утринава објави дека ќе почне да ги укинува ограничувањата наметнати на жителите на областа во близина на границата на Појасот Газа.
ПОЖАРИ Пожарот кај село Фурка меѓу општина Дојран и Богданци е се уште активен, но со намален интензитет. Гори деградирана шума-прнар, а на места има и борова шума. Пожарот е активен на кракот на западната страна кон Богданци и мал крак кон рибник „Елита“
ИНТЕГРАЦИИ Непосредна задача на бугарското Министерство за надворешни работи во однос на билатералниот дијалог со Северна Македонија ќе биде усвојување на писмен документ, што ќе ги дефинира задачите на институциите во Бугарија со конкретно утврдени обврски, изјави шефот на бугарската дипломатија Николај Милков.
ОДБЕЛЕЖУВАЊЕ Министерството за одбрана и Армијата на Република Северна Македонија денеска ќе ја одбележат 21-годишнината од загинувањето на армиските припадници кај месноста Карпалак.
РАНГИРАЊЕ Во годишниот извештај на „Global Firepower“ во кој се рангира воената моќ на секоја земја, први на листата се САД, втора е Русија, по што следуваат Кина и Индија. Во топ десетте најсилни армии уште се и Јапонија, Јужна Кореја, Франција, Велика Британија, Пакистан и Бразил. Северна Македонија е на 135 место.
КАМПАЊА Во какво општество живееме зависи од секој од нас. Секој од нас би требало да биде одговорен во делот на позицијата што ја има. И тоа е главната порака на кампањата што со мојот Кабинет ја реализираме под насловот „Зависи од мене и тебе“. Дали ќе одиме напред зависи од сите нас.
КОВИД 19 Пад на новозаболени на неделно ниво има во повеќето европски земји, вклучувајќи ја и Северна Македонија со 23 отсто помалку случаи во однос на претходниот седумдневен период.
БРЗА ПОШТА
Упорно се протестира зошто Србија добила толку повеќе од останатите од Стратешкиот инвестициски план на ЕУ за Западен Балкан од 2020. Тој план беше компетитивен, се тркаме за тие пари и имаше услови: Јасно пишува дека тие инвестиции треба да водат кон ЕКОНОМИЈА БАЗИРАНА НА ИНОВАЦИЈА, комплетна дигитализација на пазарот, и длабоки образовни реформи – за да се развие меѓународната и истражувачка компонента, врзана за дигитализација на целиот систем, пишува Катерина Колозова во објавата „ Србија ги заслужи парите од ЕУ“.
СЛОБОДНА ЗОНА
За жал, и прашањето и одговорот, со години многу површно и приземно се сведени на едно: пари. И затоа не е прашањето дали и колку културата е слободна кај нас, туку дали и колку е финансирана од државата? Речиси целосно. Ние имаме државна култура, дури и онаа која себе си се нарекува „независна сцена“ е, всушност, длабоко „државна“, но не како некаква суштинска поврзаност со државата во уметнички наратив, туку речиси како целосно финансиски зависна. И тоа е проблемот над проблемите, пишува Никица Корубин во колумната „Цензура на парите“.
Д.Мишев
