Претседателот на Собранието Африм Гаши денеска, на првиот брифинг со новинарите по преземањето на фукцијата, изјави дека интерпелацијата за него не е политички издржана. но истата ќе ја стави на дневен ред на седница.
„На седницата на Собранието на 3. септември ќе ја ставам на дневен ред и интерпелацијата за мене како претседател на Собранието. Мислам дека ова барање не е политички издржано, но секако ќе има расправа“, истакна Африм Гаши.
Осврнувајќи се на неколкуте забелешки и медиумски написи за него во изминатиот период, но и тврдењата во самото барање за интерпелација, рече дека не направил никаква повреда на секуларноста, како и дека не побарал од никого да бидат прекршени меѓународните или домашните закони.
– Од никого никогаш не сум барал да прекрши закон, изјави Гаши одговарајќи на новинарски прашања во врска со случајот со косовската претседателка Вјоса Османи и со неговото приватно патување со службени возила на свадба во Косово.
На прашањето дали смее Османи или кој било друг претседател на странска држава да одбива да ги почитува законите и безбедносните процедури на аеродром, Гаши одговори дека кој прекршил закон, треба да одговара.
„Сите треба да ги почитуваме законите, како домашните, така и меѓународните, и со ова сметам дека ви дадов одговор на прашањето”.
За свадбата на Косово на која Гаши замина со службени возила, а непроверени на граница поминале и членови на неговото семејство, Гаши оцени дека тоа е тривијално обвинување.
– Каде и да одам мора да ги известам припадниците на обезбедувањето. Тие треба да проверат каде одам. Опфатени се и моите приватни патувања. Не е добро што ме напаѓаат за тоа. Не сум одговорен јас дали некој пропуштил патници без проверка, јас не сум на пасошка контрола за да прегледувам пасоши. Немам право да одам со сопствено возило, по закон морам да бидам обезбедуван. Ќе покренам ницијатива да се видам со министерот за внатрешни работи и ова да го разрешиме – рече претседателот на Собранието.
Гаши на брифингот, исто така говореше и за уставните измени, но и за тоа дека коалицијата „Вреди“ треба да прерасне во една политичка партија.
М. Д.
