Ниту една земја не го губи идентитетот на патот кон Европската Унија. Мислам дека оваа земја може да биде сигурна во поглед на нејзиниот идентитет, култура и јазик, изјави денеска евроамбасадорот Дејвид Гир.
Тој, во интервју за Канал 5 вели дека ги разбира фрустрациите поради предолгото чекање, но нагласи дека ЕУ и Северна Македонија имаат заедничка корист од членството на земјата во Унијата.
Во смисла на гаранции како што знаете во овој процес, во овој пристапен процес има многу делови, многу моменти во пристапниот процес кога има потреба одлуките да бидат носени едногласно. Важно е дека има одговорност од наша страна да се осигураме дека кога тие одлуки ќе дојдат, тие ќе бидат носени врз основа на реформите кои државата ги има за ЕУ, а не за други прашања. Тоа беше во смисла на она што претседателката Фон дер Лајен и претседателот Мишел го пренесоа кога го посетија Скопје, минатиот јули. Секако, тоа е многу важен елемент, истакна Гир.
Според него, најдобра гаранција да се оди напред е да се спроведат тие реформи, бидејќи, како што кажа, тоа е најбрз начин за влез во ЕУ.
Потребни се големи напори предводени од Владата и вклучувајќи ги и другите институции и граѓанскиот сектор за да се протуркаат реформите, посочи Гир.
Во однос на уставните измени, евроамбасадорот смета дека таа дебата треба да се води на одговорен начин од сите засегнати страни.
