„За жал, во Македонија сѐ уште преовладуваат предрасудите за луѓето што имаат Даунов синдром, па токму затоа се доведуваат во прашање и нивните основни човекови права. Ние мора да дејствуваме во насока оваа реалност да се промени, да се направат низа реформи во институциите кои понатаму ќе овозможуваат непречено интегрирање на лицата со Даунов синдром во целокупното општество“, Ида Мантон, претседателка и основач на Центарот за Даунов синдром Македонија.
Слоганот на кампањата годинава е „Мојот глас, мојата заедница“ (#MyVoiceMyCommunity), а целта е оспособување на луѓето со Даунов синдром да проговорат, да бидат чуени и да влијаат врз владините политики и дејствувања, да бидат целосно вклучени во заедницата.
„Секоја година, гласот на луѓето со Даунов синдром и оние кои живеат и работат со нив, станува сѐ погласен. Down Syndrome International нѐ повикува сите нас, од различни краеви на светот, да одбереме активности и настани кои ќе помогнат во подигање на јавната свест за тоа што значи да имате Даунов синдром и како луѓето со Даунов синдром ги збогатуваат нашите животи и нашите заедници.
Во 2017, сите заеднички треба се фокусираме на оспособување на луѓето со ДС (и нивните гласноговорници) да проговорат, да бидат чуени и да влијаат на владините политики и дејствувања, да бидат вклучени, целосно и на еднакви основи со другите, во сите аспекти од општеството”, се вели во соопштението на Центарот за Даунов синдром.
„Постојат многу нелогичности околу голем број прашања, на пример, доколку семејството одлучи да го задржи детето со Даунов синдром, добива финансиска помош во износ од 4.000 денари. Во случај семејството да го даде детето со Даунов синдром на згрижувачко семејство, тоа семејство добива финансиска помош од 250 евра, што нема никаква логика. Освен тоа, финансиската помош им се укинува на луѓето со Даунов синдром кога ќе наполнат 20 години, што е сосема погрешно“, вели Ида Мантон.
По повод Светскиот ден на лицата со Даунов синдром, во Кинотеката на Македонија вчера беше отворена изложба на фотографии „Нераскажани приказни” на фоторепортерот Огнен Теофиловски и прикажани три документарни филмови на американски асоцијации и здруженија за Даунов синдром.