Одделот за антитероризам на грчката полиција се сомнева дека Групата на народни борци стои зад денешната силна експлозија во зградата на Апелацискиот суд во Атина, јави електронското издание на весникот „Прото тема“.
Претставници на службата за борба против тероризмот сметаат дека начинот на кој дејствувале напаѓачите личи на бомбашкиот напад врз банка на 19 април годинава, како и на поставувањето експлозивна направа во вреќа на 12 декември пред Министерството за труд. Се истакнува дека во вториот случај не дошло до експлозија поради проблеми во експлозивната направа. Во двата напади извршителите биле двајца, како и денеска, и се движеле со автомобили.
Одговорността за нападот врз банката ја презеде Групата на народните борци, активна организација за која аналитичарите од грчката антитерористичка служба сметаат дека се дел од „сферата на влијание“ на семејството терористи Никос Мазиотис и Пола Рупа, кои се наоѓаат во затвор.
Станува збор за активисти на раководството на групата Револуционерна борба, кои веќе извесно време штрајкуваат со глад затоа што, како што тврдат, властите не им дозволуваат да си го видат детето.
Во врска со денешниот напад се испитуваат и други верзии, со оглед на тоа што во моментов како активни се сметаат уште две терористички организации – Заговор на огнените јадра и Револуционерна самоодбрана.
Бомба експлодира рано изутринава во Апелацискиот суд во Атина, предизвикувајќи сериозни оштетувања на зградата и на неколку околни објекти, но не и човечки жртви.
Како што јавија грчките медиуми, силната експлозија, која се слушнала на голема оддалеченост, предизвикала шок и вознемиреност меѓу жителите на Атина.
Полицијата информира дека околу 2:50 часот по локално време (1:50 по средноевропско време) непознато лице се јавило во редакциите на „Весникот на уредниците“ и на „Зугла“, предупредувајќи дека за 40 минути ќе експлодира бомба во зградата на Апелацискиот суд.
По ова, припадници на полицијата го блокирале реонот околку судот и целосно ја испразнила зградата.
Полицијата соопшти дека смета оти станува збор за „чин на тероризам“, без да објави повеќе детали за причините за таквата оценка.
На местото на експлозијата се уште се води истрага за утврдување на видот на бомбата и за откривање на сторителите.
[divide]
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
