Меѓународните инспектори треба да добијат пристап до нуклеарната централа Запорожје, побара во понеделникот (8-ми август) генералниот секретар на ОН, Антонио Гутереш, откако Украина и Русија меѓусебно се обвинија за гранатирање на објектот, пренесува Еуобсервер.
„Секој напад на нуклеарна централа е самоубиствена работа“, рече Гутереш на прес-конференција во Јапонија по присуството на меморијалната церемонија на мирот во Хирошима за комеморација на 77-годишнината од првото атомско бомбардирање во светот.
Украина соопшти дека обновеното руско гранатирање во саботата оштетило три сензори за радијација и повредил работник во електраната Запорожје.
„Нема таква нација во светот што би можела да се чувствува безбедно кога терористичка држава пука во нуклеарна централа“, рече украинскиот претседател Володимир Зеленски во телевизиско обраќање во неделата.
Тој, исто така, ја обвини Русија дека води „нуклеарен терор“ и рече дека се потребни повеќе меѓународни санкции, овој пат за нуклеарниот сектор на Москва.
Руските трупи го зазедоа нуклеарниот објект во југоисточна Украина во март, но украинските техничари сè уште управуваат со него.
Руската амбасада во Вашингтон, исто така, објави соопштение, во кое се вели дека штетата ја предизвикал украинскиот напад со ракетен фрлач.
Во соопштението се наведува дека од гранатирањето се оштетени два високонапонски далноводи и еден водовод.
Украина вели дека Русија ја претворила централата во воена база, што го отежнува гаѓањето на руските војници и опрема.
Според „Њујорк тајмс“, Русија од средината на јули ја користи централата како покривка од која пука врз украинските сили.
Иако ОН не можеа да ја потврдат приказната на ниту едната страна, Гутереш во понеделникот рече дека Меѓународната агенција за атомска енергија (МААЕ) има потреба од пристап до централата.
„Ние целосно ја поддржуваме МААЕ во сите нивни напори во врска со создавањето услови за стабилизација на централата“, рече Гутереш.
Шефот на МААЕ, Рафаел Маријано Гроси, во саботата предупреди дека последниот напад „го нагласува многу реалниот ризик од нуклеарна катастрофа“.
Претседателот на Европскиот совет, Шарл Мишел, во неделата твитна дека „извештаите за гранатирање [во централата] се алармантни; нејзината безбедност е најголема загриженост“.
Подготви: Д.Мишев
