Од синоќа ФБ страницата на Централен регистар е под напад, а во јавноста се шпекулира дека напаѓачот е вработен во Централниот регистар, Емил Јакимовски, кој изминатите денови е во центарот на вниманието со заканите кои ги упати до новинарката Мери Јордановска и градоначалникот на Кавадарци, Митко Јанчев.
Од утрово на официјалната страница на институцијата осамнуваат објави со скандалозни содржини против актуелната директорка Марија Бошковска Јанковски.
Дека се работи за истата личност, сугерира и првиот човек на Централниот регистар, објаснувајќи дека токму Јакимовски ја креирал оваа страница пред десеттина години кога бил раководител на Одделението за маркетинг и односи со јавност.
„Почитувани, сакаме да Ве информираме дека фан страната на социјалната мрежа Фејсбук на Централен регистар на Република Северна Македонија е хакирана. Затоа Ве молиме објавите кои ќе бидат постирани од таа страна да ги игнорирате, бидејќи содржините на истата не се став на Централен регистар на Република Северна Македонија. Во моментот се изработува нова фан страна за која медиумите и јавноста дополнително ќе бидат известени. Воедно страницата е искреирана уште пред 10 години од лицето Емил Јакимовски во времето кога тој бил раководител на Одделението за маркетинг и односи со јавност. Централен регистар на Република Северна Македонија се сомнева дека ова лице стои зад постовите кои се појавија на фан страната на социјалната мрежа Фејсбук во изминатото деноноќие. Овој случај исто така ќе биде пријавен до секторот за компјутерски криминал при МВР и воедно упатуваме апел истражните органи да го испитаат“, пишува директорката Бошковска Јанковски.
Симптоматично е и тоа што објавувањето на овие содржини на страницата се случуваат еден ден подоцна, откако директорката на Централниот регистар најави дисциплинска мерка против вработениот Јакимовски.
,,Централниот регистар на Република Северна Македонија најостро ги осудува заканите на вработениот Емил Јакимовски преку Интернет врз новинарката и заменик-уредникот на А1он Мери Јордановска. Сакаме да истакнеме дека поради нарушување на работниот ред и дисциплина, како и закани кон вработени во Централниот регистар на Република Северна Македонија против Емил Јакимовски веќе е отворена дисциплинска постапка. Комисијата се уште нема одлука, бидејќи вработениот Емил Јакимовски веќе неколку месеци е на боледување. Исто така во изминатиот период во МВР има повеќе пријави од вработени во Централниот регистар поради закани од истото лице. Меѓу пријавите поднесени во МВР е и пријавата поднесена од мене лично како директор на Централен регистар Република Северна Македонија ,каде во изминатиот период сум мета на постојани напади и закани од Емил Јакимовски“, реагираше вчера директорката.
Во моментов на страницата постојано се објавуваат недолични содржини против директорката, но и други вработени во институцијата. Работата оди до таму што се навредуваат и се упатуваат закани и сексистички пораки кон граѓаните кои ја следат оваа фејсбук страница и кои коментираат на објавите.
Таков е случајот со заканите упатени кон една поранешна соработничка на ЦИВИЛ.
Потсетуваме, ЦИВИЛ остро ги осудува заканите упатени од страна на Емил Јакимовски. Воедно го повикуваме Министерството за внатрешни работи, како и секторот за компјутерски криминал веднаш да се зафатат со овој случај!
М. Ивановска
