Неколку десетини демонстранти на националистичката група „Христијанско братство“ протестираа против владата, в среда, 21 март, во вечерните часови, на плоштад Македонија, како што може да се дознае од фото и видео материјалите објавени од самите организатори.
Откако одржаа неколку конфузни говори во кои ги напаѓаа политиките на Владата, а особено Законот за употреба на јазиците, дел од толпата се упати пред канцеларијата на Иванов, во знак на поддршка на неговата блокада на законот.
Една од причините поради која беше организиран овој протест, како што се дознава од постовите на социјалните медиуми, како и од пораките кои „протекоа“ од комуникацијата на организаторите, беше и наводното стравување дека ќе биде отстранет споменикот на Александар Македонски, чие официјално име е „Воинот на коњ“. Министерството за култура соопшти дека такви активности не се предвидени, на што, пак, многумина реагираа со разочарување, бидејќи нивното очекување било токму обратното – да се започне со „демонтажа“ на озлогласениот проект „Скопје 2014“.
Што се однесува до припадниците на „братството“, тие повикаа на протест пред т.н. триумфална порта, в четврток, 22 март, со почеток во 11 часот, „да го пречекаат кумот“, како што се изразија иронично на сметка на грчкиот министер за надворешни работи Коѕијас, кој доаѓа во официјална посета на Република Македонија.
Меѓу демонстрантите беа и неколку ликови од маргините на македонската политичка сцена како Стевчо Јакимовски и Филип Петровски, двајцата познати по своите неуспеси, но и по изразената националистичка, антизападна ориентација и експлицитен говор на омраза во нивните јавни настапи.
Џ. Дерала
