Јеменското движење Хути, поддржано од Иран, соопшти дека извршило напад врз два саудиски нафтени танкери во Црвеното Море, додека саудиските власти потврдија дека еден од бродовите се запалил по инцидентот. Нападот претставува сериозна ескалација и отвора можност за нов фронт во војната меѓу САД и Иран.
Хутите тврдат дека ги нападнале танкерите Encelia и Layla, обвинувајќи ги дека ја прекршиле поморската блокада што групата ја прогласила за саудиските пристаништа во Црвеното Море. Во нападот, според нивното соопштение, биле употребени балистички и крстосувачки ракети, како и беспилотни летала, пиппуваа Гардијан.
Саудиската државна новинска агенција SPA потврди дека на танкерот Encelia избувнал пожар на предниот дел од бродот, но сите членови на екипажот се безбедно евакуирани. Властите не соопштија кој стои зад нападот.
Поморски безбедносен извор претходно информираше дека танкерот испратил повик за помош преку VHF радио, известувајќи дека бил погоден од ракета додека се наоѓал во близина на пристаништето Џизан на саудискиот брег во Црвеното Море.
Британската компанија за поморски ризици Vanguard соопшти дека танкерот бил погоден од непознат проектил на околу 130 километри југозападно од саудискиот град Ал Шукаик. Сличен извештај објави и британската агенција United Kingdom Maritime Trade Operations (UKMTO), која наведе дека добила пријава за напад врз танкер што предизвикал пожар на бродот, објави Гардијан.
Во меѓувреме, Хутите тврдат дека по нивното предупредување околу десет бродови се повлекле од пловидба кон саудиските пристаништа. Според податоци од системите за следење на пловидбата, најмалку пет танкери во средата го смениле курсот во Црвеното Море, а два продолжиле кон Суецкиот Канал.
Ескалацијата веднаш се одрази и врз енергетските пазари. Цената на суровата нафта „Брент“ повторно порасна за повеќе од три проценти и надмина 95 долари за барел.
Продолжуваат американските напади врз Иран
Во исто време, американската војска ја спроведе дванаесеттата последователна ноќ на воздушни напади врз ирански воени цели. Според американски извори, нападите траеле околу пет часа и биле насочени кон поморски капацитети, складишта за ракети и беспилотни летала, крајбрежни системи за набљудување и противвоздушна одбрана.
Иранските медиуми јавуваат дека повторно биле нападнати воени објекти во Бушер, во близина на единствената иранска комерцијална нуклеарна електрана, што е трет напад врз таа област во последните два дена.
Иранската државна телевизија извести и за американски ракетен напад врз граничниот премин Шаламче кон Ирак, при што загинале две лица, а единаесет биле повредени.
Расте бројот на жртви
И покрај континуираните американски воздушни напади, Иран и понатаму демонстрира способност за ракетни и беспилотни напади. Во текот на неделата беа нападнати постројки за вода и енергетска инфраструктура во Кувајт, како и американски воени објекти во таа земја, додека под удари се најдоа и американските сојузници Бахреин и Јордан.
Според иранското Министерство за здравство, од крајот на минатиот месец загинале најмалку 53 цивили, а 592 лица се повредени. Откако на 28 февруари започнаа воените операции на САД и Израел против Иран, според иранските власти, загинале илјадници луѓе, а милиони биле принудени да ги напуштат своите домови.
Од американска страна, досега загинале 18 припадници на вооружените сили, а повеќе од 450 војници се ранети.
Извор: Гардијан
