Левица не престанува да се натпреварува со Јанко Бачев во тоа кој ќе тропне поголема глупост. Срам да им е, навистина му се голема конкуренција, а колку се намачи Бачев, пустиот. И името на своето партииче, големо колку пола дуќанче му го смени, во пресрет на неговата „херојска“ борба против промена на името. Нели е голема и смешна глупост тоа? Па Бачев е во години, не треба овие десничариве од Левица вака да му прават!
Утрински лево-десничарски разговор со Бачев
– Па што ти направија сега тебе, Бачев, овие безобразни десни левичари? – го прашувам Бачев утрово.
– Како „па што“? Глеј ги какви соопштенија објавуваат, па! – пелтечеше Бачев и гласот му трепереше – „Јес да сме од иста страна, а тебе те мразиме, пошо си Шиптар и за многу други работи, ама ова не е фер шо ми го прават! Можев и ја едно такво соопштение да напишам, ама зафатен сум со финансиски извештаи, конверзија денар – рубља, не е мала работа! Да ме почекаа бар, заедничко да биде!“ Морав да му спуштам, за да седнам да ја напишам оваа колумна…
Јако, брат! Соопштениево…
Навистина, соопштението за „народна самоодбрана“ е нешто меѓу лош и ептен лош обид да се пишува во стилот на Монти Пајтон. Десница/Левица го наруши својот неделен попладневен комодитет и не дозволи премногу да очајува поради неуспехот на нивната „руска“ кампања и излезе со многу „јако, брат!“ соопштение.
Овој грст фолиранти побара „итно распуштање на парламентот и закажување на предвремени парламентарни избори. Формирање преодна техничка влада со ограничен мандат единствено за спроведување фер и демократски избори“. Доообро… Ајде да направиме техничка влада. Ма, каква техничка! Ќе биде тоа идеолошка влада, сенародна!
Спремете се за нова влада!
Една таква влада, нормално, би ја предводел Здравко Савески, а вицепремиер за односи би било хистеричното професорче. Се мисли на односи со Русија, се разбира. Воедно, тој ќе биде и министер за правда, жестока, десно-левичарска, што со предавниците ќе се пресмета со нивно колективно фрлање во ендек. Тој ќе заземе уште неколку позиции во владата, а ќе биде и директор на едно 300-400 институции, оти „немат љуге, брат!“.
Во тие откачени сништа, нема кој друг да биде министер за внатрешни работи, освен Јанко Бачев. За да бидат штедливи (немат љуге), тие ќе го назначат Бачев и на уште некои 30-40 други раководни позиции во МВР (не е толку ербап како професорчето, сепак). Бачев веднаш ќе се самоназначи и за командир на полицијата во Струмица, од повеќе или помалку разбирливи причини (фрустрации од детството и адолесцентското доба, нали?). Новата разузнавачка служба ќе биде наречена КГБ и нејзин шеф, природно, ќе биде токму Бачев.
Тој ќе биде назначен и за министер на неколку други ресори во владата, а ќе биде и главен опозиционер, поддржан од Русија.
За разлика од сегашната влада, тие ќе имаат и родов баланс, па ќе ги земат и антиталентираните професорки-тоталки како Каракамишева и Ванковска, а нема да ги заборават ни Солза и Жугиќ. Тие ќе држат ресори за добро воспитание, култура, образование, убавина и памет, а ќе го водат и бифето во владата. Ќе го опремат и со шипки и лајтшоу, за навечер да општат со елитните кругови на партиите на власт од кои едната ќе биде и опозиција.
Ќе ги преплавиме улиците, брат! Брат!
Патот до остварување на овој сон е прилично лесен. Улица, брат! Па вели: „Левица најавува дека во иднина се враќа на улиците и ќе ги искористи сите парламентарни и вонпарламентарни начини на политичка борба, со цел враќање на киднапираниот суверенитет на народот!“
Со ова, конечно, Девица (десна левица = девица) ни откри дека некако влегле и во парламент, можеби не со пратеничко место, но штом велат дека и со парламентарни начини ќе се борат, имаат некој веома врло добар план.
Ах, заборавив!
Па, тие сметаат на пратеничките и пратениците на ВМРО-ДПМНЕ, колку сум наивен понекогаш! ОК, малку им се намали бројот, бидејќи дел од нив се одметнаа и им свртеа грб на руските „герои“ Мицко, Грујо и остала братија. Но, сосема доволно за жестока борба со која ќе ги преплават улиците, брат!
Обзнана
Девица откриваат дека се и југо-носталгичари. Ама не по онаа социјалистичката Југославија, та нели се десничари! Тие со романтика се сеќаваат на времето кога Краљевината со злогласната Обзнана ја забрани Комунистичката партија и ја воведе 6-јануарската диктатура во 1929 година. ОК, имаше Обзнана и во 1920…
Па така, во своето веома врло опасно, ме-разбираш-брат, соопштение тие велат: „Обзнануваме дека во секоја наредна фаза на гласањето на контроверзните уставни промени ќе бидат организирани масовни антивладини простести под мотото #НароднаСамоодбрана, пред законодавниот дом, во кој седат гробарите на АСНОМска Македонија!“
Чувајте се луѓе! Купувајте зејтин, брашно, батерии… Иде циклонот Левица/Девица/Бачевица! Немој да биде после „не сме знајале“… Си кажаа луѓето во својата „Обзнана“:
„Секојдневни радикални политички акции, во координација со сите засегнати политички чинители (читај Бачев, м.з.) кои се против промена на уставното име, ќе бидат систематски преземани низ територијата на целата Република.“
А бе, поплава од љуге, брат! Тие за во влада немат љуге (брат!), инаку вака, за на улица, па нема место да има доволно, па по покриви ќе мора да протестираат!
Бачев демантира
Се разбира, сега очекувам да се јави Бачев со демант. Ќе тврди дека оваа козерија ми ја напишала германската безбедносна служба (БНД), како што тврдеше дека нашите извештаи од изборниот мониторинг ни ги прави токму оваа германска државна служба. Еден вмровец тогаш ме праша колку пари сум му платил за рекламата. Сигурен сум дека Бачев во некое од неофицијалните обраќања во иднина, ќе ме замоли да напишам нешто вакво, ама со него како главна личност. Мислам дека ќе му ја исполнам желбата. Ни тој, како ни Левица не заслужуваат внимание ни колку за половина мој збор, ама на моменти ми се забавни, па ги ставам под прстиве.
Ај да бидам сериозен уште некој ред… Иако е смешно и гротескно дејствувањето на овие веќе одамна прочитани божемни левичарчиња, нивната „Обзнана“ е сигнал дека ниту руската амбасада во Скопје, ниту Фамилијата (барем дел од неа) не се откажуваат од битката за дестабилизација и задржување на Македонија во минатото. Во моментов немат љуге (брат!), ама ќе скрпат по нешто, имат ушче нешчо пари (брат!).
илустрација во прилог на текстот: Евгениј Пономаров – „Јуриш на мртовците“
Објавено и во Плусинфо и Слободен печат
Преземање на содржините НЕ Е ДОЗВОЛЕНО, освен со писмена дозвола од ЦИВИЛ. Повредата на авторските права е забранета со закон.
Услови за користење, авторски права и заштита на приватноста
