Има право Груевски. Изминува веќе вториот месец од воспоставување на новата влада, а таа не направи ниедно дело, особено не кривично. Тој, на пример, уште во првиот месец од владеењето почна да ги корумпира и партизира државата и општеството. Како може новата влада сè уште да ги држи партиските послушници на старите позиции? Да не мисли оваа нова влада да ги претопи? Тоа би личело на Груевски, кој ги презеде и корумпираше кадрите на СДСМ, веднаш по зграпчувањето на власта и уште во првиот месец тргна во поход да деградира професионалци кои не ја прифаќаа неговата игра. Веднаш започна со операцијата на киднапирање на државата и создаде правен лавиринт преку кој спроведе грабеж невиден ни во вековната доминација на Отоманите. Така е зборот, де.
Заев и неговата влада му одат на нерви на Груевски. Него го бараат амбасадори, му честитаат и отворено ја искажуваат довербата на нивните влади во него, му доделуваат меѓународни признанија… И тоа, уште во првиот месец. А тој, кутриот патриот и пастир, дури и без пасош остана! Вистинска патриотска жртва.
Новата влада има само гревови. Вели дека ќе биде достапна и отворена. Дури и оградата околу владата имаат ќе ја симнат. Кај да е, ќе сфатат дека Скопје 2014 е фашистичко-мафијашки проект, па и него ќе го демонтираат. Ја покажаа владата од внатре, го извадија мерцедесот од гаража! И тоа не е сè! Ги укинаа владините реклами вредни тешки милиони евра и немаат намера да се рекламираат. Па се разбира, нема што да рекламираат! Немаат дела! За месец дена, наместо да се задолжат, тие вратија 55 милиони евра и направија ребаланс на буџетот со кој, наместо на богатите, одвоија пари за сиромашните. Што би рекол Суперхик на тоа?! Во министерството за финансии прибраа еден хулиган како што е Бранимир Јовановиќ. Во другите министерства и институции прибираат интелектуалци и уметници, како Петрит Сарачини, Дарко Лешоски и низа други, сè хулиган до хулиган. Ма, тортура!
Има право Груевски да биде бескрајно гневен и затоа што ниеден напад на владата не му вреди, наспроти неговото упорно гракање. Лут е затоа што не му поминуваат ни вредно украдените идеи и уличарски финти. Океј, кога ќе се појави на комитска пијанка, изгледа како да има публика. Но, тоа е мала утеха во споредба со султанскиот статус кој го имаше до пред нешто повеќе од една година.
И! Најмногу е лут Груевски, со право, што со секој свој чекор, го прави Заев да изгледа сè подобро и подобро. Тоа е нешто што и нас треба да нè замисли и да нè држи на штрек, кога ќе поминат првите 100 дена влада. До тогаш, ајде да се смееме и да се веселиме. Како комити.
објавено во Плусинфо и Слободен печат (11/7/2017)
