Само шест отсто од граѓан(и)ите сметаат дека институциите успешно се сравуваат со дезинформациите, беше заклучокот од една онлајн анкета на ЦИВИЛ – Дали институциите успешно се справуваат со говорот на омразата и лажните вести на социјалните мрежи и во медиумите?
Прашањето беше поставено на почетокот на оваа година, пришто во текот на изминативе неколку месеци организацијата бележи засилено темпо на пласирање лажни вести и дезинформации во јавноста.
Пратеникот на ВМРО-ДПМНЕ, Антонијо Милошоски, со стара вест се обиде да ги дезинформира граѓаните за тоа кои земји се изјасниле против отпочнувањето на преговори со Северна Македонија за членство во Европската Унија. Ваков вид на одлука воопшто не е донесен, а ниту, пак, земјите членки на овој Совет гласале за или против отпочнувањето на преговорите на Северна Македонија со ЕУ. Она што е донесено како конкретна одлука за Северна Македонија е дека конечната одлука ќе биде донесена во септември.
Пратеникот на ВМРО-ДПМНЕ, Димитар Стевананџија, на својот Твитер профил објави лажна фотографија со коментар дека новинарите Борјан Јовановски и Боби Христов се гости на отворање на контроверзен угостителски објект во Охрид. Оваа дезинформација беше со цел да им се наружи угледот на новинарите.
Истиот пратеник ширеше „патриотизам“ користејќи дезинформации, односно при посетата на Владата на ракометарите на „Вардар“, на една од фотографиите беше прикажана плакета што премиерот Зоран Заев од името на Владата на Република Северна Македонија им ја врачил на европските шампиони, Стевананџија објави „твит“ со фотографија од плакетата проследена со текст: „Не го зеле, им го оставиле во владината зграда“.
Во борбата против лажните вести и дезинформации – Владата ќе формира Акциска група за борба против дезинформации и напади на демократијата, во која ќе бидат поканети да учествуваат претставници од канцеларијата на Претседателот на Владата на РСМ, Претседателот на РСМ, Собранието на РСМ, Кабинетот на министерот задолжен за комуникации, транспарентност и отчетност, МВР, MO, МНР, Управата за безбедност и контраразузнавање, Агенција за разузнавање и други, чија задача ќе биде анализирање и следење на појавите на дезинформирање на јавноста и координирање на борбата против ширење на дезинформациите.
Во име на Владата на Република Северна Македонија, задолжен за координација на оваа Акциска група ќе биде министерот за комуникации, транспарентност и отчетност Роберт Поповски, а од страна на Кабинетот на премиерот одговорен ќе биде посебниот советник за односи со јавност, Марјан Забрчанец.
Дехран Муратов
