По неколкунеделни преговори, израелската влада соопшти дека ќе го поддржи прекинот на огнот од најмалку четири дена во Газа доколку Хамас ослободи 50 од заложниците што ги зароби минатиот месец. За возврат, Израел би разменил околу 150 палестински затвореници.
Како што пренесува Њу Јорк Тајмс, Хамас, како и Катар, водечките посредници во договорот, не ја коментираа веднаш информацијата.
Израелската влада соопшти дека е „посветена на враќање на сите киднапирани дома“, додавајќи: „Ослободувањето на секои 10 дополнителни киднапирани ќе резултира со дополнителен ден на одмор“. Договорот не може да биде усвоен најрано до утре, за да им се даде време на израелските судии да ги разгледаат потенцијалните правни предизвици за ослободувањето на затворениците, рекоа израелските власти.
Владата на Израел е должна да ги врати дома сите заложници, изјави израелскиот премиер.
Вечерва Владата го одобри нацртот на првата фаза од постигнувањето на оваа цел, според која најмалку 50 заложници – жени и деца – ќе бидат ослободени во текот на четири дена, при што ќе има пауза во борбите.
Ослободувањето на секои дополнителни 10 заложници ќе резултира со по уште еден ден пауза.
Владата на Израел, ИДФ (израелската армија) и безбедносните служби ќе ја продолжат војната со цел да ги вратат дома сите заложници, да ја завршат елиминацијата на Хамас и да обезбедат дека нема да има нова закана за државата Израел од Газа“., додаде израелскиот премиер.
За време на предложениот прекин на огнот, борбите ќе запрат, израелските трупи ќе останат на нивните сегашни позиции, а Израел ќе се воздржи од летање со авиони за набљудување над Газа шест часа на ден, рекоа официјалните лица. На цивилите во јужниот дел на Газа нема да им биде дозволено да се вратат на север.
Израелскиот кабинет го одобри договорот за заложници со Хамас по повеќе од шест недели интензивни борби во Газа.
Хамас и неговите сојузници во Газа убиле околу 1.200 луѓе и заробиле околу 240 заложници за време на нивниот напад врз јужен Израел на 7 октомври, според израелските власти. Израел одговори со напади од земја и од воздух, при што загинаа околу 13.000 луѓе, според здравствените власти во Газа.
Предходно, Израел ослободи значаен палестински поет два дена откако војската го приведе додека бегаше во јужниот дел на Газа.
Драган Мишев
