Израел објави дека ќе ги запре десетици хуманитарни организации да работат во Газа во рок од 36 часа поради тоа што не ги исполниле строгите нови барања за предавање на лични податоци на палестинскиот и меѓународниот персонал распореден на опустошената територија, објави Гардијан.
На листата на групи погодени од забраната се наоѓаат некои од најпознатите хуманитарни организации во светот, како што се „Акшн Еид“, „Меѓународен комитет за спасување“ и „Лекари без граници“ (МСФ).
Соопштението од Министерството за дијаспора доаѓа во услови на жестоки бури кои во последните денови уништија илјадници шатори во Газа, влошувајќи ја веќе акутната хуманитарна криза.
Министрите за надворешни работи на 10 земји изразија „сериозна загриженост“ за „повторно влошување на хуманитарната ситуација“ на опустошената територија, велејќи дека ситуацијата е „катастрофална“.
