Израел нападна цели во Јемен во понеделник вечерта, соопшти израелската војска, еден ден откако Хутите, поддржани од Иран, испалија балистичка ракета што го погоди главниот аеродром во Израел, пренесува Си-ен-ен.
Израелскиот премиер Бенјамин Нетанјаху вети дека ќе возврати во време и место што ќе го избере Израел и вети во недела дека ќе следи силен одговор.
Министерството за здравство, управувано од Хутите, соопшти дека најмалку едно лице е убиено, а уште 35 се повредени во израелски напад врз фабрика за цемент во Баџил, источно од Ходеида.
Израелските одбранбени сили (ИДФ) соопштија дека 20 од нивните борбени авиони учествувале во мисијата – првите израелски напади во Јемен по месеци – погодувајќи десетици цели на Хутите во Ходеида и околните области.
„Морското пристаниште во Ходеида се користи за трансфер на иранско оружје, опрема за воени цели и други потреби поврзани со тероризмот“, се вели во соопштението на ИДФ. Израелските борбени авиони, исто така, ја таргетираа фабриката за цемент источно од Ходеида за нејзина употреба во изградбата на тунели и воена инфраструктура, соопшти ИДФ.
Телевизискиот канал „Ал-Масира“, управуван од Хутите, соопшти дека пристаништето Ходеида било погодено најмалку шест пати, а го потврди и нападот врз блиската фабрика за цемент.
Д. Мишев
