Израелскиот премиер Бенјамин Нетанјаху нареди нови воздушни напади врз јужните предградија на Бејрут, упориште на либанското движење Хезболах, што претставува најсериозна ескалација на конфликтот во Либан од прогласувањето на прекинот на огнот во април годинава.
Во заедничко соопштение на кабинетот на Нетанјаху и израелскиот министер за одбрана Израел Кац се наведува дека нападите се одговор на, како што тврди Израел, „повторените прекршувања на прекинот на огнот од страна на Хезболах и нападите врз израелските градови и граѓани“. Цел на операцијата е квартот Дахије во јужниот дел на Бејрут, област која долго време се смета за политичко и безбедносно упориште на Хезболах.
Овој потег доаѓа по повеќенеделна ескалација на судирите долж израелско-либанската граница. И покрај прекинот на огнот објавен на 17 април, двете страни продолжија со меѓусебни напади. Израелските власти обвинуваат дека Хезболах интензивирал употреба на дронови и ракетни напади врз северен Израел и израелски воени позиции во јужен Либан, додека либанската страна тврди дека Израел секојдневно го нарушува примирјето со воздушни удари и копнени операции.
Во изминатите денови израелската армија дополнително ја прошири својата операција во јужен Либан. Израелските сили ја презедоа контролата врз историската тврдина Бофор (Beaufort Castle). Нетанјаху изјави дека Израел има намера да го „продлабочи и прошири своето присуство“ во областите кои претходно биле под влијание на Хезболах.
Израелските воздушни напади во последните недели ги погодија и Тир, Набатије, Сидон и други градови во јужен Либан, при што либанските власти соопштуваат за илјадници загинати и повеќе од еден милион раселени лица од почетокот на конфликтот во март.
Новите напади врз Бејрут предизвикаа остра реакција од повеќе европски држави. Франција побара итна седница на Советот за безбедност на Обединетите нации, додека европските лидери предупредуваат дека продолжувањето на офанзивата може дополнително да ја дестабилизира целата блискоисточна регија.
Во исто време, САД се обидуваат да посредуваат за нов договор за деескалација меѓу Израел и Либан. Според дипломатски извори, американскиот државен секретар Марко Рубио предложил план со кој Хезболах би ги прекинал нападите врз Израел, а Израел би се воздржал од понатамошни удари врз Бејрут.
ЦИВИЛ Медиа Деск
