Во Македонија корупцијата не е клучен проблем на граѓаните и тие имаат мал отпор кон неа. Кога им се бара мито, тие најчесто даваат. На 36 отсто од граѓаните им било побарано мито, а 31 отсто дале. Затоа е потребно подигнување на јавната свест за борба против корупцијата, но и зајакнување на сите механизми и граѓански и институционални за справување со овој проблем.
Ова се дел од ставовите и податоците изнесени на денешната конференција на тема „Конвенција на ООН против корупција и интегритетот, транспарентноста и антикорупциските превентивни политики“, со која почнува проект за следење на борбата против корупцијата, нешто што од земјава го бара и Европската унија, како дел од обврските за почнување претпристапни преговори.
Претставникот на Делегацијата на ЕУ во Македонија Никола Бертолини истакна дека е потребно да се зајакне улогата на граѓанскиот сектор, да се применува заштитата на „свиркачите“ кои би пријавиле корупција, да се воспостави нов ефикасен модел на Антикорупциска комисија со силни овластувања, но и со финаниски и човечки ресурси за справување со проблемот.
– Корупцијата ги ослабува државните институции и ја уништува демократијата и владеењето на правото, негативно влијае врз општествениот и економскиот развој и на приходот на државата, рече Бертолини.
Борбата против корупцијата рече е приоритет на оваа влада, но потенцира, последната година не е забележан некаков прогрес. Според него, анкетите на МЦМС покажуваат перцепција притисок на корупцијата и неверување на граѓаните дека таа може да биде искоренета.
– ЕУ очекува дека државата ќе даде доказ за репресија и спречување на корупцијата, кој ќе покаже дека политиките се спроведуваат проактивно и без дискриминација и дека ќе испорачаат опипливи резултати како придобивка за сите граѓани, рече Бертолини.
Заменик-министерот за правда Оливер Ристовски истакна дека Владата е целосно посветена на спречување на корупцијата и оти за таа цел се прават и законски измени, се изготвува и стратегија, а, како што рече, се бара и најсоодветен модел на антикорупциска комисија која ќе биде ефикасна во намалувањето или решавањето на овој општествен проблем.
– Во тек е и ревизија на Кривичниот законик и се надеваме дека уште повеќе ќе го зголемиме опсегот на кривичните дела поврзани со корупцијата и ќе се дообработат веќе постојните кривични дела во оваа насока, рече тој.
Александар Кржаловски од МЦМС, организатор на конференцијата, истакна дека истражувањето што го направиле во март годинава покажува дека во Македонија е мал отпорот кон корупцијата.
– На 36 проценти од граѓаните им било побарано некоја форма на мито или корупција, а 31 отсто дале. Кај нас е мал отпорот и кога се бара обично се дава мито за да се заврши работата, рече Кржаловски. Додаде дека на земјава и претсои обемна работа за да се сменат состојбите и свеста. (МИА)